రాష్ట్రంలో పురపాలక ఎన్నికలకు మంగళవారం నోటిఫికేషన్ విడుదల కావడంతో నామినేషన్లు జోరందుకున్నాయి. ఇందులో భాగంగా ఉమ్మడి కరీంనగర్ జిల్లాలో తొలిరోజు నామినేషన్లు జోరుగా సాగాయి.
కరీంనగర్ జిల్లాలో హుజూరాబాద్, జమ్మికుంట 2 పురపాలక సంఘాలు ఉండగా.. మొదటి రోజు 21 నామినేషన్లు దాఖలయ్యాయి. ఇందులో హుజూరాబాద్లో 11 నామినేషన్లు దాఖలవగా... జమ్మికుంటలో 10 నామినేషన్లు దాఖలయ్యాయి.
జగిత్యాలలో...
జగిత్యాల మున్సిపాలిటీలో 48 వార్డులకు గానూ తొలిరోజు నామినేషన్ల దాఖలుకు అంతగా స్పందన కనిపించలేదు. రేపటి నుంచి అభ్యర్థులు నామినేషన్లు వేసేందుకు సిద్ధమవుతున్నారు.
పెద్దపల్లిలో...
పెద్దపెల్లి జిల్లాలో 2 పురపాలక సంఘాలు ఉండగా.. మొత్తం 7 నామినేషన్లు దాఖలయ్యాయి. పెద్దపల్లి పురపాలికలో 36 వార్డులకు గానూ 5 నామినేషన్లు, సుల్తానాబాద్ పురపాలికలో 15 వార్డులకు గానూ 2 నామినేషన్లు దాఖలయ్యాయి.
రాజన్న సిరిసిల్లలో...
రాజన్న సిరిసిల్ల జిల్లా మున్సిపాలిటీలో 39 వార్డులకు గానూ అధికారులు 13 నామినేషన్ కేంద్రాలను ఏర్పాటు చేశారు. తొలిరోజు 19వ వార్డు నుంచి అన్నారం శ్రీనివాస్, 6వ వార్డు నుంచి గొల్లపల్లి రామానుజన్లు తెరాస తరఫున నామినేషన్ దాఖలు చేయగా.. 38 వార్డు నుంచి రిక్కుమల్ల సంపత్, 2వ వార్డు నుంచి కాంగ్రెస్ అభ్యర్థి మడుపు శ్రీదేవి నామినేషన్లు దాఖలు చేశారు.
హుస్నాబాద్లో...
పూర్వపు కరీంనగర్ జిల్లాలోని హుస్నాబాద్ మున్సిపాలిటీలో 20 వార్డులకు గానూ మొదటి రోజు 17 నామినేషన్లు దాఖలయ్యాయి. ఇందులో తెరాస నుంచి 6, కాంగ్రెస్ నుంచి 9, భాజపా నుంచి 1, 1 స్వతంత్ర అభ్యర్థి నామినేషన్లు వేశారు.
తెరాసలో ఎక్కువ మంది ఆశావాహులు పార్టీ టికెట్లు ఆశిస్తుండడం వల్ల అభ్యర్థుల ఎంపికలో తెరాస వ్యూహాత్మకంగా వ్యవహరిస్తోంది. ఫలితంగా చివరి రోజైన శుక్రవారం నామినేషన్లు అధికంగా దాఖలయ్యే అవకాశం ఉంది.
ఇవీచూడండి: పురపోరుకు ములుగు ఎందుకు దూరమైంది..?
