నాయకులు ప్రజల కోసం పనిచేస్తుంటే పదవులు అవే వస్తాయని పెద్దపల్లి జడ్పీ ఛైర్మన్ పుట్ట మధు అన్నారు. తెరాస పార్టీ నాయకులు ఎమ్మెల్సీ కవిత, ఎంపీ సంతోష్ రావులపై మాజీ మంత్రి ఈటల రాజేందర్ చేసిన వ్యాఖ్యలను ఆయన ఖండించారు. పెద్దపల్లి జిల్లా రామగిరి మండలం సెంటినరీ కాలనీ టీబీజీకేఎస్ కార్యాలయంలో నిర్వహించిన మీడియా సమావేశంలో ఆయన మాట్లాడారు.
మంథని నియోజకవర్గంలో చీకటి పాలనను అంతమొందించడానికి ఎమ్మెల్సీ కవిత చేసిన కృషి మరువలేమని పుట్ట మధు అన్నారు. ఆమె ముఖ్యమంత్రి కూతురిగా కాకుండా ప్రజల పక్షాన ఉండి, ప్రజల కోసం పనిచేస్తున్నారని కొనియాడారు. ప్రజా సమస్యలపై స్పందించే విధానాన్ని చూసి టీబీజీకేఎస్ నేతలు కవితను గౌరవ అధ్యక్షురాలిగా ఎన్నుకున్నారని తెలిపారు.
పార్టీ అభివృద్ధికి, తెలంగాణ ఆవిర్భావం కోసం ఎంపీ సంతోష్ రావు ఎంతో కృషి చేశారని పేర్కొన్నారు. ఈటల రాజేందర్ ఆయనపై వచ్చిన ఆరోపణలపై జవాబు చెప్పాలి కానీ ఇలా పార్టీ నేతలపై విమర్శలు చేయడం తగదని హితవు పలికారు. ఆయన వ్యాఖ్యలను వెనక్కి తీసుకోవాలని డిమాండ్ చేశారు. కవితకు సంపూర్ణ మద్దతు ఉంటుందని.. వారి నాయకత్వంలోనే పనిచేస్తామని స్పష్టం చేశారు.
ఇదీ చదవండి: JNTU: జులై 1 నుంచి ఇంజినీరింగ్‌ చివరి పరీక్షలు
