పెద్దపల్లి జిల్లాలోని 14 గ్రామాల్లో రెండు మండలాలైన సుల్తానాబాద్‌, రామగిరి మండలాల్లో ఎస్సారెస్పీ ఆయకట్టు ప్రభావిత బావులు ఉండటం మూలంగా వీటిని మినహాయించి మిగిలిన 12 మండలాల్లో భూగర్భ నీటి నిల్వలను అధికారులు ప్రామాణికంగా లెక్కిస్తారు. ఇందులో మంథని, రామగుండం మండలాల్లో భూగర్భ నీటి వనరులు ఏటికేడు తగ్గుతుండటం ఆందోళన కలిగిస్తోంది.
ముఖ్యంగా మంథని మండలంలోని ఐదు గ్రామాలైన ఎగ్లాస్‌పూర్‌, స్వర్ణపల్లి, నాగేపల్లి, మల్లారం, వెంకటాపూర్‌ గ్రామాల్లో భూగర్భజలాలు అడుగంటిపోవడం మూలంగా సాగు, తాగు నీటి లభ్యతకు ఇబ్బందులు ఏర్పడ్డాయి. భూగర్భజల శాఖ అధికారులు ఈ గ్రామాల్లో ‘వాల్టా’ అమలు చేస్తున్నారు. ఈ గ్రామాల్లో నీటి వనరుల కోసం బోర్లు తవ్వడం, ఇసుక తరలింపుపై సర్కార్‌ ఆంక్షలు విధించింది. లాక్‌డౌన్‌ కారణంగా గత సంవత్సరంతో పోల్చుకుంటే ఈ ఏడాది జలవనరుల తగ్గుదలలో మార్పులు లేవు.
రామగుండంలో భారీ పరిశ్రమలైన ఆర్‌ఎఫ్‌సీఎల్‌, ఎన్టీపీసీ, తెలంగాణ ఎస్టీపీపీ, సింగరేణి, సిమెంట్‌ పరిశ్రమల్లో నీటి వినియోగం తగ్గిపోవడం మూలంగా కొంత వరకు భూగర్భ జలాలు సురక్షిత స్థాయిలోనే ఉన్నాయి. మంథనిలో ఇసుక అక్రమ తరలింపు ఎక్కువగా జరగడం మూలంగా నీటి నిల్వల నిష్పత్తులు తగ్గిపోయాయి.
జిల్లాలో గత ఏడాది ఏప్రిల్‌లో భూగర్భ జలమట్టం సగటున 11.51 మీటర్లు ఉండగా ప్రస్తుతం 8.30 మీటర్లలోనే నీరు లభ్యమవుతున్నాయి. గతేడాదితో పోలిస్తే ప్రస్తుతం 3.21 మీటర్లపైన ఉన్నాయి. ఈ సంవత్సరం ఏప్రిల్‌లో సగటు సాధారణ వర్షపాతం 11.8 మిల్లీమీటర్లు ఉండగా 6.2 మి.మీటర్ల వర్షపాతం నమోదైంది.
ఏ మండలంలో ఎంత?
- మంథని మండలంలోని ఎగ్లాస్‌పూర్‌లో గత ఏప్రిల్‌లో 24.20 మీటర్లులో భూగర్భజలాలు లభించగా ఈ సంవత్సరం 21.40 మీటర్ల లోతులో ఉన్నాయి.
- అంతర్గాం మండలం గోలివాడలో గత సంవత్సరం 20.55 మీటర్లకు నీటి నిల్వలు తగ్గిపోగా ఈసారి 8.64 మీటర్ల లోతులో నీటి నిల్వలు ఉన్నాయి.
- కమాన్‌పూర్‌ మండలం రొంపికుంటలో గత ఏప్రిల్‌లో 8.80 మీటర్లు ఉండగా ఈ సారి 2.05 మీటర్లలో లభ్యమవుతున్నాయి.
మరింత పెరిగే అవకాశం
ఒకవైపు కాళేశ్వరం అనుబంధ ప్రాజెక్టుల నిర్మాణంతోపాటు వర్షాలు సమృద్ధిగా కురవడంతో ఇప్పటి వరకు నీటి నిల్వలు సమృద్ధిగా ఉన్నాయి. రానున్న జూన్‌, జులై నెలల్లో వర్షాలు విపరీతంగా కురుస్తాయని వాతావరణశాఖ పేర్కొన్నందున ఇంకా భూగర్భజలాల నిల్వలు పెరిగే అవకాశాలు ఉన్నాయి.
- శ్యాంప్రసాద్‌నాయక్‌, జిల్లా భూగర్భ జలవనరులశాఖ అధికారి
