అద్భుత నిర్మాణం.. కాలగర్భంలో కలిసిపోతోంది

దేవాలయాలు మానసిక ప్రశాంతతకు, ఆధ్యాత్మిక చింతనకు కేంద్రాలు.  ప్రాంతీయ వైభవానికి... జీవన విధానానికి, సంస్కృతి సంప్రదాయలకు ప్రతీకలు. పురాతన ఆలయాలు ఆనాటి కళాకారుల నైపుణ్యం, పూర్వీకుల చరిత్రకు నిలువెత్తు సాక్ష్యాలు. అంతటి విశిష్ఠత ఉన్న ఈ సంపదపై నిర్లక్ష్య నీలిమేఘాలు కమ్ముకున్నాయి. గుప్తనిధుల కోసం కొందరు గుళ్లను మింగేస్తుంటే.. ప్రకృతి విపత్తుల వల్ల ఇంకొన్ని కాలగర్భంలో కలిసిపోతున్నాయి. ఎంతో ప్రసిద్ధి చెంది శిథిలావస్థకు చేరిన  ప్రాచీన దేవాలయాల్లో ఒకటి  పెద్దపల్లి జిల్లా మంథని మండలం గుజపడుగు సమీపాన ఉన్న కాశీపేట దేవాలయాలు.

పెద్దపల్లి జిల్లా ఆధ్యాత్మిక ప్రాంతాలకు నెలవు. జిల్లాలోని మంథని మండలం గుజపడుగు గ్రామానికి ఆమడ దూరాన పవిత్ర గోదావరి నదీ తీరాన ఉన్న కాశీపేట దేవాలయాలు ఎంతో పురాతనమైనవి. నేడు ఈ ఆలయాలు శిథిలావస్థకు చేరాయి.

కాకతీయుల నాటి దేవాలయం

కాశీపేట దేవాలయాలు సుమారు వెయ్యేళ్ల కిందట కాకతీయుల కాలంలో నిర్మించినట్లు శాసనాల ద్వారా తెలుస్తోంది. ఈ కోవెల 64 రాతి స్తంభాలతో నిర్మించారు. అచ్చు వేయి స్తంభాల గుడిని పోలి ఉంటుంది. ఈ సురస్థాన సముదాయాల్లో శివాలయం, రామాలయం, ఆంజనేయ ఆలయాలుండేవి. ఈ కట్టడాలను చూస్తే కాకతీయుల శిల్పకళావైభవం ఉట్టిపడుతోంది.

ఆలయ ప్రత్యేకత

ఈ ఆలయానికి ఉత్తర దక్షిణ ద్వారములు, తూర్పున రెండేసి చొప్పున ప్రధాన ద్వారాలుండేవి. ఏ దిక్కు నుంచి చూసినా నాలుగు సమానంగా కనిపించడం ఈ నిర్మాణం ప్రత్యేకత. రాతి స్తంభాలపై చెక్కిన శిల్పాలు, ఆలయం పైకప్పుభాగంలో చక్రాలు, పద్మమలు, చూపరులను కట్టిపడేస్తాయి.

కనుమరుగైన ఖ్యాతి

కొన్నేళ్ల కిందట రజాకార్లు ఈ ఆలయాన్ని ధ్వంసం చేశారు. విగ్రహాలను దొంగలు హస్తగతం చేసుకున్నారు. మరికొన్నింటిని ధ్వసం చేశారు. గుప్తనిధుల కోసం ఆలయంలో తవ్వకాలు చేపట్టి దేవాతా మూర్తులను మట్టిలో కలిపేశారు. విలువైన విగ్రహాలు ఎత్తు కెళ్లిపోయారు. అప్పటి నుంచి ఈ ఆలయం ఖ్యాతిని కోల్పోయింది.

ఎంతో విశిష్టత కలిగిన ఈ దేవాలయాన్ని కాలగర్భంలో కలిసిపోకుండా పురావస్తుశాఖ, ప్రభుత్వం దృష్టి సారించి దేవాలయానికి మరమ్మతులు చేయాలని స్థానికులు కోరుకుంటున్నారు. భావితరాలకు చరిత్రను తెలియజేసేందుకున్న ఇటువంటి ఆలయాలపై ప్రభుత్వం దృష్టి సారిస్తే ఎంతో విలువైన సంపదను కాపాడుకున్నవాళ్లమవుతాం.
ఇది చదవండి: కాళేశ్వరంలో ఒక్క పంప్... 35వేల మోటార్లకు సమానం