Cyber Fraud in Hyderabad : "మీ పేరు సత్యనారాయణేనా? కన్ఫామ్ చేసినందుకు ధన్యవాదాలు. మేము ఇంటర్నేషనల్ డీహెచ్‌ఎల్‌ ఎక్స్‌ప్రెస్‌ ఆఫీసు నుంచి మాట్లాడుతున్నాం. మీరు మరింత సమాచారం కోసం ఒకటి నొక్కండి" అని అవతలి నుంచి గొంతు పలికింది. చెప్పినట్టుగానే సత్యనారాయణ ఒకటి నొక్కారు. ఆ తర్వాత ఏం జరిగింతో ఇప్పుడు చూద్దాం.
హైదరాబాద్ నగరానికి చెందిన సత్యనారాయణ (పేరు మార్చాం) వయసు 61 సంవత్సరాలు. ప్రేవేటు ఉద్యోగిగా ఉన్నారు. ఆయనకు ఇంటర్నేషనల్ డీహెచ్‌ఎల్‌ ఎక్స్‌ప్రెస్‌ ఆఫీసు నుంచి ఫోన్ కాల్ వచ్చింది. ఆ కాల్ లిఫ్ట్ చేసిన తర్వాత సత్యనారాయణ వివరాలు కన్ఫామ్ చేసుకున్నారు. ఆ తర్వాత అదనపు సమాచారం కోసం మొబైల్లో ఒకటో నంబర్ నొక్కండి అని చెప్పారు. ఆయన అలాగే చేశారు. వెంటనే అవతలి నుంచి ఓ వ్యక్తి లైన్లోకి వచ్చి, మీ పేరు మీద ఒక పార్శిల్ వచ్చిందని, అందులో 140 గ్రాముల డ్రగ్స్, 5 పాస్‌పోర్టులు ఉన్నాయని చెప్పారు.
సత్యనారాయణ హడలిపోయారు. ఆ పార్శిల్ తనది కాదని, తనకు దానితో ఎలాంటి సంబంధమూ లేదని అన్నారు. దీంతో మీరు లైన్లోనే ఉండాలని, ఢిల్లీ సైబర్ సెల్ అధికారికి కనెక్ట్ చేస్తున్నామని చెప్పాడు అవతలి వ్యక్తి. అప్పుడు మరో వ్యక్తి లైన్లోకి వచ్చి ఢిల్లీ సైబర్ సెల్ నుంచి మాట్లాడుతున్నట్టు చెప్పాడు. నిషేధిత డ్రగ్స్, పాస్ పోర్టు మాత్రమే కాకుండా, మీరు 4 బ్యాంకు ఖాతాలు ఓపెన్ చేసి, మనీలాండరింగ్‌కు పాల్పడ్డారని బెదిరించాడు.
ఇప్పుడు మీరు ఎక్కడికీ పారిపోలేరని, పూర్తిగా మా నిఘాలో ఉన్నారని చెప్పాడు. ప్రతి గంటకూ మీకు ఫోన్ చేస్తూనే ఉంటామని, తమకు రిపోర్టు చేయాలని సూచించాడు. అదే సమయంలో ఈ విషయం ఎవ్వరికీ చెప్పకూడదని, చివరకు కుటుంబ సభ్యులనూ ఈ విషయం షేర్ చేసుకోవద్దని అన్నారు. తమ మాటలు కాదని, ఎవరితోనైనా చెబితే కుటుంబ సభ్యులను కిడ్నాప్ చేసి, హత్య చేస్తామని బెదిరించారు. దీంతో సత్యనారాయణ మరింతగా బెదిరిపోయారు.
వెంటనే తాము చెప్పిన బ్యాంకు అకౌంట్కు RTGS పద్ధతిలో డబ్బులు ట్రాన్స్ఫర్ చేయాలని అన్నారు. ఆ తర్వాత గంట, గంటకూ తమకు ఫోన్ లో అందుబాటులో ఉండాలని, తాము ఫోన్ చేస్తే తప్పకుండా లిఫ్ట్ చేయాలని చెప్పారు. లేకపోతే మీ కొడుకు ప్రాణాలు తీస్తామని హెచ్చరించారు. తక్షణం ఫెడరల్‌ బ్యాంక్‌ అకౌంట్కు డబ్బు సెండ్ చేయాలని చెప్పడంతో తన డిపాజిట్‌ సొమ్ము నుంచి 20 లక్షల రూపాయలు పంపించారు సత్యనారాయణ. ఆ తర్వాత మళ్లీ మళ్లీ వేధింపులు చేస్తుండడంతో చివరకు ఆ విషయాన్ని కుమారుడికి చెప్పారు. వెంటనే అతను 1930 నంబరు ద్వారా సైబర్ అధికారులకు ఫిర్యాదు చేశారు. బాధితుల ఫిర్యాదు మేరకు కేసు నమోదు చేసి దర్యాప్తు చేస్తున్నట్టు పోలీసులు వెల్లడించారు.
