రాష్ట్ర ప్రభుత్వం పేదలకు అందిస్తున్న రేషన్ బియ్యాన్ని కొందరు దళారులు తక్కువ ధరకు కొనుగోలు చేసి మహారాష్ట్ర, గుజరాత్ రాష్ట్రాలకు తరలిస్తున్నారు. పెద్దపెల్లి జిల్లాలోని బసంత్ నగర్, పొత్కపల్లి పోలీస్స్టేషన్ పరిధిలో పోలీసులు దాడులు నిర్వహించారు. సోదాల్లో 450 క్వింటాళ్ల రేషన్ బియ్యంతో పాటు రెండు వాహనాలు సీజ్ చేశారు. నలుగురు నిందుతులను అదుపులోకి తీసుకున్నట్లు డీసీపీ అశోక్కుమార్ తెలిపారు.
మంచిర్యాల జిల్లా దండపల్లి పోలీస్ స్టేషన్ పరిధిలోని వెంకటాపూర్లో అక్రమంగా నిలువ ఉంచిన 150 క్వింటాళ్ల రేషన్ బియ్యంతో పాటు శ్రవణ్ అనే వ్యక్తిని అరెస్టు చేసినట్లు డీసీపీ పేర్కొన్నారు. ప్రజలకు అందాల్సిన బియ్యాన్ని పక్కదారి పట్టిస్తున్న వారిపై కఠిన చర్యలు తీసుకుంటామని హెచ్చరించారు.
