లారీ డ్రైవర్​పై తెరాస కార్యకర్తల దాడి.. శ్రీధర్​ బాబు ఆగ్రహం

మంథనిలో ఓ లారీ డ్రైవర్​పై ఆదివారం నాడు తెరాస కార్యకర్తలు దాడి చేశారు. బాధితుడు గాయాలతో ఎమ్మెల్యే శ్రీధర్​ బాబు వద్దకు వెళ్లి తన గోడు వెళ్లబోసుకున్నాడు. అధికార పార్టీ కార్యకర్తలు ప్రత్యక్షంగా దాడులకు దిగుతున్నా.. పోలీసులు ఎలాంటి చర్యలు తీసుకోవడం లేదని ఆగ్రహం వ్యక్తం చేశారు.

పెద్దపల్లి జిల్లా మంథనిలో ఎరుకల గూడెంకు చెందిన గంగాధరి సత్యనారాయణ అనే లారీ డ్రైవర్​పై ఆదివారం తెరాస కార్యకర్తలు దాడి చేశారు. తన కళ్లల్లో కారం చల్లి దాడికి దిగినట్లు బాధితుడు ఎమ్మెల్యే శ్రీధర్​ బాబు వద్దకు గాయాలతో వెళ్లాడు. వెంటనే సత్యనారాయణను ప్రభుత్వ ఆస్పత్రికి తీసుకెళ్లి చికిత్స చేయించి.. పోలీసులతో మాట్లాడారు. ఈ విషయంపై కాంగ్రెస్​ నాయకులు కొంతసేపు ధర్నా నిర్వహించారు.

సామాజిక మాధ్యమాల్లో ఇష్టం వచ్చినట్లుగా పోస్టింగులు పెట్టే వారిపై చర్యలు తీసుకోవాలని కేసీఆర్​ అన్నారని.. అయితే మంథని నియోజకవర్గంలో అధికార పార్టీ వారు మాత్రమే ఇష్టం వచ్చినట్లు ప్రచారం చేస్తున్నారని శ్రీధర్​ బాబు ఆరోపించారు. ప్రత్యక్షంగా దాడులకు దిగుతున్నారని, అయినా పోలీసులు ఎలాంటి చర్యలు తీసుకోవడం లేదని ఎమ్మెల్యే ఆగ్రహం వ్యక్తం చేశారు.

మంథని మున్సిపాలిటీలో రౌడీయిజం నడుస్తోందని, తమని చంపుతారా అని బాధితుడి భార్య నిలదీశారు. ఇంత జరుగుతున్నా.. పోలీసులు పట్టించుకోవడం లేదని, ఇక్కడ ప్రజాస్వామ్యం ఖూనీ అయిందని అన్నారు. పోలీసులు తెరాస కార్యకర్తల్లా పని చేస్తున్నారని విమర్శించారు.

ఇవీ చూడండి: అయిజ పీఠం తెరాసకే! ఏఐఎఫ్​బీ మద్దతు