పెద్దపల్లి జిల్లా గోదావరిఖని గౌతమీనగర్లోని శ్రీ బాలాజీ రైస్ మిల్లో నిల్వ చేసిన 97 క్వింటాళ్ల బియ్యాన్ని రామగుండం టాస్క్ఫోర్స్ పోలీసులు స్వాధీనం చేసుకున్నారు. గత వానా కాలంలో రైతుల నుంచి కొనుగోలు చేసిన ధాన్యాన్ని వివిధ కేంద్రాల నుంచి కొనుగోలు చేసి శ్రీరాజరాజేశ్వర బీఆర్ఎం ఇండస్ట్రీస్ పేరుతో అనుమతులు పొందారు. ధాన్యాన్ని అదే మిల్లులో మిల్లింగ్ చేయాల్సి ఉండగా.. శ్రీ బాలాజీ మిల్లులో మిల్లింగ్ చేయించారు.
ఆరు నెలలు నిల్వ ఉంచిన బియ్యాన్ని రాజరాజేశ్వర బీఆర్ఎం ఇండస్ట్రీ పేరుతో పౌరసరఫరాల శాఖకు రవాణా చేయాలని నిర్ణయించారు. ఈ అక్రమ దందాపై సమాచారం అందుకున్న టాస్క్ ఫోర్స్ పోలీసులు శ్రీ బాలాజీ రైస్మిల్లును తనిఖీ చేయగా 97 క్వింటాళ్ల బియ్యం పట్టుబడింది. లారీల్లో లోడ్ చేసిన 95 బస్తాల బియ్యాన్ని పోలీసులు స్వాధీనం చేసుకున్నారు.
