వృద్ధురాలి అంత్యక్రియలకు చేయూతనిచ్చిన పౌండేషన్

కరోనా సమయంలో ఓ వృద్ధురాలు అనారోగ్యంతో కన్నుమూసింది. అంత్యక్రియలు నిర్వహించేందుకు ఎవరూ ముందుకు రాలేదు. విజయమ్మ పౌండేషన్ స్పందించి వృద్ధురాలి అంత్యక్రియలకు బాసటగా నిలిచింది. ఈ సంఘటన పెద్దపెల్లి జిల్లాలో జరిగింది.

ఓ నిరుపేద వృద్ధురాలి అంత్యక్రియలకు విజయమ్మ ఫౌండేషన్ ప్రతినిధులు బాసటగా నిలిచి ఔదార్యం చాటారు. పెద్దపెల్లి జిల్లా గోదావరిఖనిలోని విఠల్​నగర్​కు చెందిన వృద్ధురాలు ఇరికిల్ల లింగమ్మ మంగళవారం మృతి చెందింది. తనకు ఆర్థిక స్తోమత లేకపోవడం వల్ల అంత్యక్రియలు చేసేందుకు ఎవరూ ముందుకు రాలేదు.

విజయమ్మ ఫౌండేషన్ వ్యవస్థాపకులు కోరికంటి మణిదీప్ స్పందించారు. అంత్యక్రియల నిర్వహణకు ఆ పౌండేషన్ సభ్యులు ఇరుగురాళ్ల శ్రావణ్​, మేకల అబ్బాస్ తమ వంతుగా మూడువేల ఆర్థిక సహాయాన్ని అందించారు. ఈ సందర్భంగా అంత్యక్రియలకు బాసటగా నిలిచిన పౌండేషన్​ ప్రతినిధులను కాలనీవాసులు అభినందించారు. ఈ కార్యక్రమంలో విజయమ్మ పౌండేషన్ సభ్యులు చోప్పదండి శ్రీకాంత్, వికాస్, సృజన్ పాల్గొన్నారు.

ఇదీ చూడండి : ఈ కామర్స్ పేరిట తెరవెనుక ఆన్‌లైన్ జూదం... యువకులకు వల