శ్రీరాంసాగర్​ నుంచి యాసంగికి నీరు విడుదల

ఉత్తర తెలంగాణ జిల్లాల వరప్రదాయిని శ్రీరాంసాగర్​ జలాశయం నుంచి యాసంది పంటల సాగుకోసం అధికారులు నీటిని విడుదల చేశారు. ప్రధాన కాలువల ద్వారా వారబందీ పద్ధతిలో విడుదల చేయనున్నామని అధికారులు తెలిపారు.

నిజామాబాద్ జిల్లాలోని శ్రీరాంసాగర్ జలాశయం నుంచి యాసంగి పంట సాగుకు కాకతీయ, లక్ష్మి, సరస్వతి కాలువల ద్వారా అధికారులు నీటిని విడుదల చేశారు. ఈ యాసంగిలో దిగువ మానేరు కింద 4 లక్షల ఎకరాలకు, సరస్వతి కాలువ కింద 35వేల ఎకరాలకు, లక్ష్మి, హన్మంత్​ రెడ్డి ఎత్తిపోతల పథకాల కింద 33 వేల ఎకరాలకు నీటిని విడుదల చేయడానికి అధికారులు ప్రణాళిక రచించారు. రైతులు పొదుపుగా వాడుకోవాలని... నీటిని కాలువల ద్వారా వారబందీ పద్ధతిలో (8 రోజుల విడుదల, 7 రోజుల నిలుపుదల) విడుదల చేయనున్నామని ప్రాజెక్టు ఈఈ రమేశ్​ తెలిపారు. ఏప్రిల్ 10 తర్వాత ఎట్టి పరిస్థితుల్లో కూడా నీటిని విడుదల చేయమని... కాలువల చివరన ఉన్న రైతులు ఆరుతడి పంటలు వేసుకోవాలని ప్రాజెక్టు అధికారులు చెబుతున్నారు.

ఇవీ చూడండి: పెరిగిన కాళేశ్వరం ఆరో ప్యాకేజీ పనుల అంచనా వ్యయం