'పాక శ్రీకాంత్​ది ప్రభుత్వ ప్రేరేపిత హత్యే..'

నిరుద్యోగ యువత ఆత్మహత్యలపై భారత విద్యార్థి సమాఖ్య ఆందోళన చేపట్టింది. పోరాడి సాధించి తెచ్చుకున్న తెలంగాణలో ఉద్యోగాలు లేక నిరుద్యోగులు ఆత్మహత్యలకు పాల్పడుతున్నారని ఆరోపించింది. నిజాబాబాద్​ జిల్లా కేంద్రంలో ప్రభుత్వానికి వ్యతిరేకంగా నినాదాలు చేస్తూ నాయకులు నిరసన చేపట్టారు.

తెలంగాణ యూనివర్సిటీ విద్యార్థి పాక శ్రీకాంత్​ది ప్రభుత్వ ప్రేరేపిత హత్యే అని భారత విద్యార్థి సమాఖ్య(ఎస్​ఎఫ్​ఐ) ఆరోపించింది. నిజామాబాద్ జిల్లా కమిటీ ఆధ్వర్యంలో ఎస్​ఎఫ్​ఐ నాయకులు ఆందోళన చేపట్టారు. ప్రభుత్వం ఉద్యోగ నోటిఫికేషన్లు ఇవ్వకపోవడం వల్లనే ఆత్మహత్యలు జరుగుతున్నాయని మండిపడ్డారు. శ్రీకాంత్​ హత్యను ప్రేరేపిత హత్యగా భావించి సీఎం కేసీఆర్​, మంత్రులు సబితా ఇంద్రారెడ్డి, జగదీశ్​ రెడ్డిలపై సుమోటోగా కేసులు నమోదు చేయాలని డిమాండ్​ చేశారు.

మరణించిన శ్రీకాంత్​ కుటుంబంలో ఒకరికి ప్రభుత్వ ఉద్యోగం, రూ. కోటి ఎక్స్​గ్రేషియా ఇవ్వాలని నాయకులు డిమాండ్ చేశారు. రాష్ట్ర ప్రభుత్వం వెంటనే ఉద్యోగ ఖాళీలు భర్తీ చేయాలని.. లేనిపక్షంలో ఉద్యమాలు ఉద్ధృతం చేస్తామని హెచ్చరించారు. ఈ కార్యక్రమంలో నగర అధ్యక్షులు వేణుగోపాల్, జిల్లా కమిటీ సభ్యులు సతీష్, నాయకులు సాయి, గోపాల్ తదితరులు పాల్గొన్నారు.

ఇదీ చదవండి: సుప్రీంకోర్టు నిర్ణయించే వరకు ఎల్‌ఆర్‌ఎస్‌ అమలు చేయొద్దు: హైకోర్టు