నిజామాబాద్ జిల్లా ఎడ్లపల్లి మండలం ఎంపీడీవో కార్యాలయం ఎదుట పోచారం గ్రామస్థులు ధర్నా నిర్వహించారు. పోచారం గ్రామంలో నిర్మిస్తున్న వైకుంఠధామం ముఖ ద్వారాన్ని తొలగించి.. వేరే ప్రాంతంలో నిర్మించాలని డిమాండ్ చేశారు. ఈ మేరకు ఎడ్లపల్లి ఎంపీడీవోకు వినతిపత్రాన్ని అందజేశారు.
తాము పొలాలకు వెళ్లాలన్నా, కోతల సమయంలో కోత మెషీన్, ట్రాక్టర్లు పొలాల్లోకి వెళ్లడానికి వీలు లేకుండా ద్వారం నిర్మాణం చేపడుతున్నారని.. గ్రామస్థులు ఆవేదన వ్యక్తం చేశారు. అధికారులు, ప్రజాప్రతినిధులు వెంటనే స్పందించి వైకుంఠధామం ద్వారాన్ని మార్చి తమకు న్యాయం చేయాలని వారు కోరుతున్నారు.
