Nizamabad Young Man Climbed Kilimanjaro : కిలిమంజారోను అధిరోహించిన నిజామాబాద్​ యువకుడు.. నెక్ట్స్ టార్గెట్​ అదే..!

Nizamabad Young Man Climbed Kilimanjaro : లక్ష్యం ఎంచుకుంటే సరిపోదు.. అందుకు తగ్గట్టు కృషి ఉండాలి. కలలు కనగానే సరిపోదు.. సాకారం చేసుకునే సంకల్పం ఉండాలి. ఆ కృషి.. సంకల్పం తనలో మెండుగా ఉన్నాయని నిరూపించాడు నిజామాబాద్‌కు చెందిన మారుతి. పేదరికం అడ్డొస్తున్నా.. తన కలను సాకారం చేసుకునేందుకు నిరంతరం శ్రమించాడు. ప్రతిఫలంగా ప్రపంచంలో ఎత్తైన పర్వతాల్లో ఒకటైన కిలిమంజారోను అధిరోహించి ఔరా అనిపించాడు. మరి ఆ యువకుడి భవిష్యత్‌ లక్ష్యం ఏంటి..? తన పర్వతారోహణ ప్రయాణం ఎలా సాగిందో ఈ కథనంలో తెలుసుకుందాం.

Nizamabad Young Man Climbed Kilimanjaro : పర్వతారోహణ అంటే మాటలు కాదు. చాలా జాగ్రత్తలు తీసుకుంటూ సన్నద్ధం కావాలి. వాటన్నీంటిని విజయవంతంగా ఎదుర్కొని.. ఆర్థిక ఇబ్బందులు అధిగమించి ముందుకు సాగాడు ఈ యువకుడు. ఇటీవల కిలిమంజారో(Mount Kilimanjaro)ని అధిరోహించాడు. అక్కడ త్రివర్ణపతాక రెపరెపలాడించి.. తన చిన్ననాటి కలతో పాటు దేశభక్తిని చాటుకున్నాడు నిజామాబాద్(Nizamabad)​కు చెందిన మారుతి

నిజామాబాద్ జిల్లా మారుమూల గ్రామమైన నాళేశ్వర్‌కు చెందిన ఓ వ్యవసాయ కుటుంబంలో జన్మించాడు మారుతి. చిన్నప్పటి నుంచి పర్వతాలు పర్వతారోహణ చేయాలని కలలు కనేవాడు. చదువులోనూ రాణించేవాడు. ఈ క్రమంలోనే బాసర ట్రిపుల్ ఐటీలో ఇంజినీరింగ్ కోర్సు పూర్తి చేశాడు. ప్రస్తుతం హైదరాబాద్‌లోని ఓ ప్రైవేటు కంపెనీలో ఉద్యోగం చేస్తున్నాడు ఈ యువకుడు.

పర్వతారోహణ చేయాలన్న తన కలకు అనుగుణంగా.. అందుకు సంబంధించిన అంశాలపై అవగాన పెంచుకున్నాడు మారుతీ. ఇంటర్‌ నుంచే వీటి కోసం కొన్ని ఆర్టికల్స్ చదివాడు. ఈ క్రమంలో పశ్చిమబంగలోని డార్జిలింగ్‌లో అవకాశం వచ్చినా ఆర్థిక సమస్యలతో వెల్లలేకపోయానని.. అయినా తన సాధనను ఆపలేదని అంటున్నాడు. పర్వతారోహణ ఖర్చుతో కూడుకున్నది. అయితే ఆ ఆర్థికభారం తల్లిదండ్రులపై పడకూడదు అని చాలా ప్రయత్నాలు చేశాడు మారుతి. అలా మనోడి ఆసక్తి గమనించి గ్రామస్థులు, మిత్రులు కొంతమేర ఆర్థిక సాయం చేశారు. మరో రూ.3 లక్షల వరకు అప్పుచేసి తన లక్ష్యాన్ని చేరుకున్నానని చెబుతున్నాడు.

కిలిమంజారోను అధిరోహించడానికి చాలా ఇబ్బందులు ఎదుర్కొన్నాడు మారుతి. అయితే మువ్వన్నెల జెండా ఆ పర్వతంపై రెపరెపలాడించి పడ్డ కష్టాలను మర్చిపోయానని చెబుతున్నాడు. నిరంతర శ్రమ, ఆత్మస్థైర్యం.. ఇంకా అపజయాలు తనను ఈ గమ్యాన్ని చేర్చాయని అంటున్నాడు మారుతి. ఇక్కడితో తన లక్ష్య ఛేదన పూర్తి కాలేదని.. తర్వాత మౌంట్‌ ఎల్‌బ్రస్, రష్యా వెళ్లేందుకు సన్నద్ధం అవుతున్నట్లు చెబుతున్నాడు ఈ యువ పర్వతారోహకుడు.

"నాకు పర్వతారోహణ చేయాలని ఇంటర్​ చదువుతున్నప్పుడు ఆసక్తి కలిగింది. తర్వాత నేను ఇంటర్నెట్​లో పర్వతారోహణకు సంబంధించిన ఆర్టికల్స్​ చదివేవాడిని. కొన్ని రోజుల తర్వాత డార్జిలింగ్​ పర్వతారోహణ చేయడానికి అవకాశం వచ్చింది. కానీ అప్పుడు ఆర్ధికపరమైన కారణాలతో వెళ్లలేకపోయాను. అనంతరం నేను పర్వతారోహణలో శిక్షణ తీసుకున్నాను. శిక్షణ అనంతరం.. ఆఫ్రికాలోని మౌంట్​ కిలిమాంజారో అధిరోహించడానికి సెలెక్ట్​ అయ్యానని చెప్పారు. మా గ్రామంలోని కొందరు యువకులు ఆర్ధిక సహాయం చేశారు. తల్లిదండ్రుల ప్రోత్సాహంతో విజయవంతంగా మౌంట్​ కిలిమంజారో అధిరోహించాను". - మారుతి, పర్వతారోహకుడు, నిజామాబాద్​ జిల్లా