తెలంగాణలో పరువు నిలబెట్టుకునేందుకు భారతీయ జనతా పార్టీ శతవిధాల ప్రయత్నిస్తోంది. మొన్నటి శాసనసభ ఎన్నికల్లో పొరపాట్లను సరిదిద్దుకుని లోక్సభ సమరానికి సై అంటోంది. నాలుగు నుంచి ఐదు లోక్సభ స్థానాలే లక్ష్యంగా జాతీయాధ్యక్షుడు అమిత్ షా అడుగులేస్తున్నారు. బుధవారం నిజామాబాద్ సభతో ఎన్నికల శంఖారావాన్ని పూరించబోతున్నారు.
కమలం పరువు దక్కేనా..!
ఐదేళ్ల క్రితం మోడీ మేనియా దేశవ్యాప్తంగా సునామీలా పాకింది. తెలంగాణలో మాత్రం ఒక్క పార్లమెంట్ సీటుతోనే సరిపెట్టుకుంది. మొన్నటి అసెంబ్లీ ఎన్నికల్లో కారుజోరులో కొట్టుకుపోయింది. ఆఖరికి సిట్టింగ్ స్థానాలను కోల్పోవడమే కాదు వందకు పైగా స్థానాల్లో డిపాజిట్ పోగొట్టుకుంది. ఈ పార్లమెంట్ ఎన్నికల్లో పోయిన పరువు దక్కించుకోవాలని ఆశ పడుతోంది. 16స్థానాలను గెల్చుకుంటామని సవాల్ చేస్తున్న తెరాసను ఢీకొట్టేందుకు బలమైన ప్రత్యర్థులను రంగంలోకి దింపాలనుకుంటోంది భాజపా.
ఐదు స్థానాలే లక్ష్యం
ఇప్పటికే లోక్సభ నియోజకవర్గాలను నాలుగు కస్టర్లుగా విభజించిన కమలదళం.. నాలుగైదు స్థానాలను గెల్చుకునేందుకు ప్రచారాన్ని షురూ చేస్తోంది. కాస్తో కూస్తో కార్యకర్తల బలమున్న సికింద్రాబాద్, మల్కాజ్‌గిరి, చేవెళ్ల, నిజామాబాద్, మహబూబాబాద్ సీట్లపై ప్రత్యేక దృష్టి పెట్టింది. తొలివిడతగా భాజపా జాతీయాధ్యక్షుడు అమిత్షా నిజామాబాద్లో అడుగుపెడుతున్నారు.
అమిత్షా మ్యాజిక్ పనిచేస్తుందా..!
మొన్నటి అసెంబ్లీ ఎన్నికల్లో కాషాయ అగ్రనేతలు కాళ్లకు బలపాలు కట్టుకుని తిరిగిన ఒక్క సీటు రాలేదు కదా దాదాపు వందకు పైగా స్థానాల్లో డిపాజిట్ గల్లతయ్యింది. మరీ ఈసారి అమిత్షా పర్యటన కలిసొస్తుందా..? లేక మళ్లీ చతికల పడుతుందా..? వేచి చూడాలి.
