Students Came from Ukrain: యుద్ధభూమి ఉక్రెయిన్ నుంచి మరో తెలంగాణ విద్యార్థి సురక్షితంగా తన స్వగ్రామానికి చేరుకుంది. నిర్మల్ జిల్లా కుంటాలకు చెందిన చేపూరి అలేఖ్య.. గురువారం(మార్చి 3న) రాత్రి 10 గంటలకు హైదరాబాద్ చేరుకుంది. తల్లిదండ్రులు పురుషోత్తం, శశికళ మధ్యాహ్నమే శంషాబాద్ విమానాశ్రయానికి చేరుకుని అలేఖ్యను రిసీవ్ చేసుకున్నారు. యుద్ధం మొదలైన పది రోజుల అనంతరం.. ఎన్నో మలుపుల తర్వాత ఎట్టకేలకు స్వదేశానికి వచ్చిన అలేఖ్యను చూసి తల్లిందండ్రులు, సన్నిహితులు ఉద్వేగానికి లోనయ్యారు. నిన్న రాత్రి హైదరాబాద్ చేరుకున్న అలేఖ్య.. ఈరోజు ఉదయం స్వగ్రామానికి చేరుకున్నారు.
బంకర్లో తలదాచుకున్నాం..
స్వగ్రామానికి చేరుకున్న అలేఖ్యను.. నిర్మల్ జిల్లా భాజపా అధ్యక్షురాలు రమాదేవి పలకరించారు. వారితో పాటు గ్రామంలోని ప్రభుత్వ పాఠశాల విద్యార్థులు అలేఖ్యను కలిసి కుశలం అడిగారు. వారం రోజుల నుంచి రష్యా-ఉక్రెయిన్ మధ్య యుద్ధం జరుగుతుండడంతో తాన తీవ్ర ఆందోళనకు గురైనట్టు తెలిపారు. తాను ఉంటున్న ప్రాంతంలో బాంబులు పడుతుండడంతో.. హాస్టల్ కింద ఉన్న బంకర్లో తలదాచుకున్నామని.. తాము పడిన బాధలను వివరించారు. తమను క్షేమంగా ఇంటికి వచ్చేలా చేసిన ప్రధాని మోదీకి కృతజ్ఞతలు తెలిపారు.
ఎంతో గర్వంగా అనిపించింది..
"మెడిసిన్ కోసం 5 ఏళ్ల క్రితం ఉక్రెయిన్ వెళ్లాను. నాలుగున్నరేళ్ల పాటు చదువు ప్రశాంతంగా కొనసాగింది. అనుకోకుండా యుద్ధం మొదలైంది. మేం ఉంటున్న ప్రాంతంలోనూ బాంబులు పడ్డాయి. హస్టల్ కింద ఉన్న బంకర్లో రెండు రోజుల పాటు ఉన్నాం. ఆ తరువాత ఎంబసీ సూచన మేరకు ఇండియా జెండాలు పట్టుకుని రుమేనియా వరకు చేరుకున్నాం. అక్కడ రెండు రోజులు ఉన్నాం. నిన్న యుద్ధ విమానంలో దిల్లీకి చేరుకుని.. అక్కడి నుంచి రాత్రి హైదరాబాద్కు వచ్చి.. ఉదయానికి ఇంటికి వచ్చేశాం. ఉక్రెయిన్లో తాము ఉన్న ప్రాంతం నుంచి బయలు దేరినప్పుడు సరిహద్దులో భారతదేశ జెండాను చూసి వదిలిపెట్టారు. అప్పుడు ఎంతో గర్వంగా అనిపించింది. కేంద్ర ప్రభుత్వం, ముఖ్యంగా ప్రధానమంత్రి మోదీకి ధన్యవాదాలు." - అలేఖ్య, మెడిసిన్ విద్యార్థిని
తమ కూతురిని సురక్షితంగా దేశానికి తీసుకురావడానికి సహకరించిన కేంద్ర ప్రభుత్వం, రాష్ట్ర ప్రభుత్వానికి తల్లిదండ్రులు ధన్యవాదాలు తెలిపారు. ఉక్రెయిన్లో మన దేశ జెండా చూసి వదిలిపెట్టడం సంతోషంగా ఉందని హర్షం వ్యక్తం చేశారు.
ఇదీ చూడండి:
