బాసరలో అక్షరాభ్యాసాలు ఆలస్యం.. భక్తుల ఆగ్రహం

మంచి ముహూర్తం.. అమ్మవారి సమక్షంలో అక్షరాభ్యాసం.. తమ పిల్లలు ఉన్నత చదువులు చదవాలనే ఆకాంక్షతో భక్తులు తెల్లవారుజామునే బాసర చేరుకున్నారు. కానీ ఆలయ అధికారులు వారి ఆశలపై నీళ్లు చల్లారు. వీఐపీల సేవలో తరించి.. ముహూర్తం దాటాక సామాన్యులకు అక్షరాభ్యాసం చేయించారు.

ప్రసిద్ధ పుణ్యక్షేత్రం బాసరలో అక్షరాభ్యాస కార్యక్రమం ఆలస్యం కావడంపై భక్తులు ఆగ్రహం వ్యక్తం చేశారు. తమ పిల్లల అక్షరాభ్యాసానికి ఉదయం 8 గంటల 5 నిమిషాలకు శుభ ముహూర్తం ఉందని భావించిన భక్తులు తెల్లవారు జాము నుంచే ఆలయానికి బారులు తీరారు. ఆలయ అధికారులు లోపలికి అనుమతించకపోవడంపై అసహనం వ్యక్తం చేశారు.

వీఐపీల సేవలో...

ఆలయ అధికారులు సామాన్య భక్తులను పట్టించుకోకుండా వీఐపీల సేవలో తరించారు. తెలంగాణ ఇరిగేషన్​ ఇంజినీర్​ భూపతిరాజు నాగేంద్రరావు తన మనుమరాలితో అక్షరాభ్యాసం చేయించి అమ్మవారిని దర్శించుకున్నారు. అంతకు మునుపు అర్చకులు ఆయనకు పూర్ణకుంభంతో స్వాగతం పలికి ప్రత్యేక మండపంలో పూజలు నిర్వహించారు.

భక్తుల ఆగ్రహం

ఆలయ అధికారులు వీఐపీలకు అధిక ప్రాధాన్యమిచ్చి తమను నిర్లక్ష్యం చేయడంపై భక్తులు ఆగ్రహం చెందారు. గేటు ముందు నిరసన తెలిపారు. పరిస్థితిని గమనించిన ఆలయ అధికారులు 27 నిమిషాలు ఆలస్యంగా భక్తులను అనుమతించారు.

ఇదీ చదవండి :నెక్లెస్​రోడ్డులో భాజపా రన్​ ఫర్​ మోదీ