అధికారులపై ప్రజాప్రతినిధుల ఆగ్రహం

నారాయణపేట మండల సర్వసభ్య సమావేశంలో అధికారుల పనితీరుపై ప్రజాప్రతినిధులు ఆగ్రహం వ్యక్తం చేశారు. అధికారుల తప్పిదాలతో గ్రామస్థాయిలో ప్రజాప్రతినిధులు బదనాం అవుతున్నారని ఆవేదన వ్యక్తం చేశారు.

నారాయణపేట మండల సర్వసభ్య సమావేశం ఎంపీపీ శ్రీనివాస్​రెడ్డి అధ్యక్షతన జరిగింది. ఈ సందర్భంగా మండలంలోని అధికారుల పనితీరుపై ప్రజాప్రతినిధులు ఆగ్రహం వ్యక్తం చేశారు. చాలా మంది రైతులు రైతుబంధు పథకానికి నోచుకోవటం లేదని, భగీరథ పైపులైన్​ పనులు పూర్తిస్థాయిలో చేపట్టలేదని సర్పంచ్​ రామ్మోహన్​ తెలిపారు. కోటకొండలో విద్యుత్​ సమస్య పరిష్కరించాలని చెబితే లైన్​మెన్​ రూ.7వేలు అడిగినట్లు సర్పంచ్​ విజయలక్ష్మి ఆరోపించారు.

గ్రామాల్లో శ్మశానవాటిక, డంపింగ్​ యార్డుల నిర్మాణాలకు కేటాయించిన ప్రభుత్వ, భూముల విషయంలో రైతుల నుంచి అభ్యంతరాలు వ్యక్తం అవుతున్నట్లు సభ్యులు తెలపగా సర్వేచేస్తామని తహసీల్దార్​ హామీ ఇచ్చారు. సభ్యులు ప్రస్తావించిన సమస్యలు, పరిష్కారానికి సంబంధించి వారం రోజుల్లో అధికారులు నివేదిక ఇవ్వాలని ఎంపీపీ సూచించారు.