బీసీ కమిషన్​ ముందు గోడు వెళ్లబోసుకున్న దివిస్​ బాధిత రైతులు

చౌటుప్పల్​లోని దివిస్​ ఫార్మా నుంచి వచ్చే వ్యర్థాల కారణంగా నీటి కాలుష్యంతో తాము వ్యవసాయం చేయలేకపోతున్నామని సమీప ప్రాంతాల రైతులు ఆరోపించారు. ఇక్కడి వనరులను వాడుకొని తమ ప్రాంతాల నిరుద్యోగులకు ఉద్యోగాలను కల్పించడం లేదని వాపోయారు. ఈ మేరకు జాతీయ బీసీ కమిషన్​ ముందు తమ గోడు వెళ్లబోసుకున్నారు.

నల్గొండ జిల్లా చౌటుప్పల్​ మండల నిరుద్యోగ యువత, రైతులు.. దివిస్​ ఫార్మా కంపెనీపై ఇచ్చిన ఫిర్యాదుతో సంబంధిత అధికారులు సమావేశమయ్యారు. రైతుల పొలాలను పరిశీలించారు. ఫార్మా కంపెనీ నుంచి వచ్చే వ్యర్థ రసాయనాల వల్ల గాలి, నీరు కాలుష్యాలు ఏర్పడుతున్నాయని.. ఈ ప్రభావంతో కంపెనీ చుట్టుపక్కల పొలాల్లో వ్యవసాయం చేయలేకపోతున్నామని జాతీయ బీసీ కమిషన్​కు రైతులు తెలిపారు. స్థానికంగా నివసించే కుటుంబాల్లో అర్హత ఉన్న యువతకి కంపెనీలో ఉద్యోగాలు ఇవ్వడం లేదని ఆరోపించారు. ఇక్కడి వనరులు వాడుకొని కంపెనీ సీఎస్​ఆర్​ నిధులను బయటి ప్రాంతాలకు తీసుకెళ్లి అభివృద్ధి చేస్తున్నారని పేర్కొన్నారు. ఈ సమావేశంలో జాతీయ బీసీ కమిషన్ సభ్యులు తల్లోజు ఆచారి, జాయింట్ కలెక్టర్ శ్రీనివాస్ రెడ్డి, పీసీబీ అధికారులు, లేబర్ డిపార్ట్​మెంట్ అధికారులు తదితరులు పాల్గొన్నారు.

అధికారులకు ఆదేశాలు

రైతుల ఆవేదన, నిరుద్యోగ యువత ఫిర్యాదుపై జాతీయ బీసీ కమిషన్​ స్పందించింది. ఒక్కో గ్రామంలోని బోరు నుంచి నీళ్ల శాంపిల్స్​ను తీసుకొని 15 రోజుల్లో నివేదిక ఇవ్వాలని పీసీబీని కమిషన్​ ఆదేశించింది. కంపెనీలో పనిచేస్తున్న స్థానిక, స్థానికేతర ఉద్యోగుల వివరాలను తెలపాలని లేబర్ డిపార్ట్​మెంట్​కు సూచించింది. అనుమతులు లేకుండా కంపెనీ విస్తరణ జరుగుతోందని రైతులు తెలపడంతో దీనిపై సంబంధిత శాఖ చర్యలు తీసుకోవాలని పేర్కొంది. అన్ని శాఖల అధికారులతో చర్చించి 15 రోజుల్లో నిర్ణయం తీసుకుంటామని కమిషన్​ సభ్యులు తెలిపారు.

ఇదీ చదవండి: హన్మకొండలో కరోనా నిబంధనలు గాలికొదిలి సెమిస్టర్ పరీక్ష..