రైతులను సంఘటితం చేసేందుకు రాష్ట్ర ప్రభుత్వం ప్రతిష్ఠాత్మకంగా చేపట్టిన రైతు వేదికలను దశలను వారీగా ప్రారంభించేందుకు సన్నాహకాలు ప్రారంభం అయ్యాయి. సిద్ధంగా ఉన్న రైతు వేదికలను వెంటనే ప్రారంభించాలంటూ.. మూడు రోజుల క్రితమే అన్ని జిల్లాల కలెక్టర్లకు ఆదేశాలు అందాయి. ఈ క్రమంలో దశలవారీగా ప్రారంభించేందుకు జిల్లాల అధికారులు సమాయాత్తమవుతున్నారు. రానున్న వారం రోజుల్లో ఉమ్మడి నల్గొండ జిల్లాలోని అన్ని ప్రాంతాల్లో వీటిని అందుబాటులో ఉంచనున్నారు. సూర్యాపేట జిల్లా మునగాలలో రైతు వేదిక మొదలుకాగా... మిగతా చోట్ల సైతం ప్రారంభం కానున్నాయి.
రైతన్నకు తోడుగా
గతేడాది మే 21న ప్రగతిభవన్లో సమావేశం నిర్వహించిన ముఖ్యమంత్రి... రైతు వేదికల బాధ్యతలను జిల్లాల రైతు బంధు సమితి అధ్యక్షులకు అప్పగించారు. వ్యవసాయ విస్తరణాధికారి పరిధిని క్లస్టర్గా తీసుకున్నారు. ప్రతి ఏఈవో పరిధిలో 5 వేల ఎకరాల వ్యవసాయ భూములు ఉండాలని నిర్దేశించారు. నల్గొండ, సూర్యాపేట, యాదాద్రి భువనగిరి జిల్లాల పరిధిలో మొత్తం... 314 రైతు వేదికలు రూపుదిద్దుకున్నాయి. ఆరుగాలం కష్టపడుతున్న సాగుదారుకు ఒక వేదిక, ఐక్యత లేవంటూ... నేరుగా వారి వద్దకే శాస్త్రవేత్తలు, వ్యవసాయాధికారులు వచ్చి సూచనలు ఇచ్చేలా ఈ వేదికలు ఉండాలని కేసీఆర్ భావించారు.
ఉమ్మడి జిల్లా వ్యాప్తంగా 314
నిర్మాణంలో భాగంగా ఒక్కో రైతు వేదికకు ప్రభుత్వం రూ. 22 లక్షలు కేటాయించింది. గ్రామీణ ప్రాంతాల్లోనైతే వ్యవసాయ శాఖ నుంచి రూ. 12 లక్షలు, ఉపాధిహామీ నుంచి రూ. 10 లక్షలు నిర్మాణానికి అధికారులు తీసుకున్నారు. ఇక పట్టణ ప్రాంతాల్లో రూ. 12 లక్షలు వ్యవసాయ శాఖ నుంచి, మిగతా సొమ్మును కలెక్టరు ఖాతాలోని నిధుల నుంచి వెచ్చిస్తున్నారు. మూడు జిల్లాల పరిధిలో 314 నిర్మాణాలకు రూ. 69.08 కోట్లు కేటాయించారు.
సాంకేతిక పద్ధతులు, పరిశోధన వంటి అంశాలకు సంబంధించి ఎలా వ్యవహరించాలన్న విషయాలపై రాష్ట్ర స్థాయి అధికారుల నుంచి సలహాలు అందనున్నట్లు జిల్లా యంత్రాంగం చెబుతోంది. డ్రమ్ సీడర్ల అవసరం బాగా పెరిగిన దృష్ట్యా... ఆ దిశగా రాష్ట్ర వ్యవసాయ శాఖ నుంచి సూచనలు రానున్నట్లు తెలుస్తోంది. పంటల కాలంలో ఎరువులు, పురుగు మందులు ఎలా వేయాలి.. కోతల సమయంలో మార్కెటింగ్ విధానం ఎలా ఉండాలన్న అంశాలపై అవగాహన కల్పించనున్నారు. రైతు వేదికలు అందుబాటులోకి వస్తున్నా... ఫర్నిచర్, విద్యుత్తు సరఫరాతో పాటు సిబ్బంది నియామకం చేపట్టాల్సి ఉంది.
ఇదీ చదవండి: ముగిసిన కృష్ణా నదీ యాజమాన్య బోర్డు త్రిసభ్య కమిటీ సమావేశం
