న్యాయవాద వృత్తి ముసుగులో భూకబ్జాలు.. పీడీ యాక్టు ప్రయోగం

న్యాయవాద వృత్తి ముసుగులో భూ ఆక్రమణలకు పాల్పడడం, బాధితులను బెదిరించి వసూళ్లకు పాల్పడుతున్న వ్యక్తిపై నల్గొండ జిల్లా పోలీసులు పీడీ యాక్టు కింద కేసులు నమోదు చేశారు. నిందితులు బంటు బుచ్చిబాబు, అతని కుమారుడు మహేశ్​, బావమరిది పాపయ్యలను అరెస్ట్​ చేశారు. భూ వ్యవహారాల్లో ఎలాంటి సమస్యలున్న పోలీసుల దృష్టికి తీసుకురావాలని జిల్లా ఎస్పీ రంగనాథ్​ సూచించారు.

న్యాయవాద వృత్తి ముసుగులో వందల ఎకరాలు భూ కబ్జా చేయడం సహా, బాధితులను బెదిరించడం, నకిలీ పత్రాలు సృష్టించి బలవంతపు వసూళ్లకు పాల్పడుతున్న వ్యక్తిపై నల్గొండ జిల్లా పోలీసులు పీడీ యాక్ట్ కింద కేసులు నమోదు చేశారు. నిందితులు బంటు బుచ్చిబాబు, అతని కుమారుడు మహేశ్​, బావమరిది పాపయ్యలను అరెస్ట్​ చేశారు.

మిర్యాలగూడ పట్టణం రామచంద్ర గూడేనికి చెందిన బంటు బుచ్చిబాబు.. పట్టణం సమీపంలోని ఖాళీగా ఉన్న ప్రభుత్వ, ప్రైవేటు భూముల ఆక్రమణలకు పాల్పడుతున్నట్లు పోలీసులు గుర్తించారు. పలు భూములకు సంబంధించి నకిలీ పత్రాలు సృష్టించి బాధితుల నుంచి డబ్బులు డిమాండ్ చేస్తున్నట్లు తెలిపారు. వివాదాస్పద భూముల విషయంలో జోక్యం చేసుకుని .. ఇరువర్గాల నుంచి అందినకాడికి దోచుకుంటున్నట్లు ప్రాథమిక విచారణలో గుర్తించినట్లు పేర్కొన్నారు. ఒక్క దామరచర్ల మండలంలోనే 220 ఎకరాల ప్రభుత్వ భూమిని కబ్జా చేసినట్లు అధికారులు తెలిపారు.

పట్టణంలోని వృత్తి విద్యా కళాశాలకు సంబంధించిన భూమికి నకిలీ పత్రాలు సృష్టించినట్లు పోలీసులు తెలిపారు. అనంతరం బాధితునితో రూ.16 లక్షలకు ఒప్పందం చేసుకున్నట్లు పేర్కొన్నారు. కేవలం రూ.లక్షకే రసీదు ఇచ్చాడని.. బాధితులు తెలిపారు.

వసూళ్లు..

మిర్యాలగూడ పట్టణంలోని బంగారుగడ్డలో 956 సర్వే నంబర్​లో నేరెళ్ల పాపయ్య.. ఐదు ఎకరాల భూమిలో ప్లాట్లు చేసి విక్రయించాడు. అనంతరం ఆ భూమికి నకిలీ పత్రాలు సృష్టించి.. సుమారు 50 మంది నుంచి డబ్బులు వసూళ్లకు పాల్పడ్డారని బాధితులు ఆవేదన వ్యక్తం చేశారు.

అదే సర్వే నంబర్​కు సంబంధించి.. రేగట్టె నారాయణ రెడ్డి, రవీందర్ రెడ్డి రెండు ఎకరాల భూమి కొనుగోలు చేశారు. అందులో ఒక ఎకరం భూమి పట్టా చేసుకొని నిందితులు వివాదం రేపారు. అనంతరం రవీందర్​రెడ్డి.. రెవెన్యూ కోర్టును ఆశ్రయించాడు. అప్పటి నుంచి బుచ్చిబాబు.. ఇబ్బందులకు గురిచేస్తున్నట్లు బాధితులు తెలిపారు.

పట్టణ సమీపంలోని 114 సర్వే నంబర్​లోని చెరువు శిఖం భూముల్లో రెవెన్యూ అధికారుల సాయంతో కొంత భూమిని కబ్జా చేసినట్లు అధికారులు గుర్తించారు. చైతన్య నగర్ భూ విషయంలోనూ వివాదం చోటు చేసుకోగా.. దుకాణదారులు, బాధితులు మూడేళ్లలో పలు దఫాలుగా నిర్వహించిన చర్చలు అనంతరం రాజీపడ్డారని పోలీసు విచారణలో తెలిసింది.

పలు ఠాణాల్లో కేసులు..

ఇప్పటివరకు బుచ్చిబాబుపై ఒకటో పట్టణ పోలీస్​ స్టేషన్​లో మూడు కేసులు, రెండు పట్టణ ఠాణాలో 2 కేసులు, దామరచర్లలో మరో కేసు నమోదైనట్లు పోలీసులు తెలిపారు.

బుచ్చిబాబు కబ్జా వ్యవహారంలో ప్రభుత్వ ఉద్యోగుల పాత్ర పైనా సమగ్ర విచారణ జరపాలని. బాధితులు కోరుతున్నారు. భూకబ్జాలకు సంబంధించి ఎలాంటి సమస్యలున్నా.. పోలీసుల దృష్టికి తీసుకురావాలని ఎస్పీ రంగనాథ్ బాధితులను కోరారు.

ఇవీచూడండి: ఈ ఆట ఆడారా? మీ వివరాలు చైనా సంస్థల గుప్పిట్లో ఉన్నట్లే..