అధికారులు సహకరించటం లేదని సర్పంచ్​ ఆత్మహత్యాయత్నం

గ్రామంలో తలపెట్టిన అభివృద్ధి పనులకు అధికారులు సహకరించటంలేదని ఓ సర్పంచ్​ ఆత్నహత్యకు యత్నించారు. అధికార పార్టీ నాయకులు దౌర్జన్యాలు చేసి... తమ కుటుంబసభ్యులను జైల్లో పెట్టించారని.. తాను సర్పంచిగా ఉండి లాభం ఏముందని లేఖ రాసిపెట్టి మరీ ఆత్మహత్యాయత్నం చేశారు.

నాగర్​కర్నూల్ జిల్లా వంగూర్ మండలంలోని రంగాపూర్ గ్రామ సర్పంచ్​ చింత ఝాన్సీ ఆత్మహత్యకు యత్నించారు. అధికారులు సహకరించడం లేదని, అధికార పార్టీ నాయకులకు వత్తాసు పలుకుతున్నారని ఓ లేఖ రాసి నిద్ర మాత్రలు మింగారు. కుటుంబ సభ్యులు గమనించి వెంటనే కల్వకుర్తిలోని ఓ ప్రైవేటు ఆస్పత్రికి తరలించారు.

గ్రామంలో ప్రకృతి వనానికి స్థలం కేటాయించాలని గతంలో అధికారులకు ఫిర్యాదు చేయగా... వారు వచ్చి గ్రామకంఠం భూమి 3.32 ఎకరాలను పంచాయతీకి అప్పగించారని లేఖలో తెలిపారు. ఆ భూమి గ్రామ కంఠానిది కాదని.. తమదని అదే గ్రామానికి చెందిన ఓ అధికార పార్టీ వ్యక్తి దౌర్జన్యంగా తమపై కేసు పెట్టి తన తండ్రి, అన్నయ్యతోపాటు 8 మందిని 20 రోజులుగా జైలులోనే ఉంచారని ఆవేదన వ్యక్తం చేశారు. అధికారులు, పోలీసులు సహకరించడంలేదని... తాను సర్పంచిగా ఉన్నా ఫలితం ఏముందని... ఆత్మహత్య చేసుకుంటున్నట్లు లేఖలో పేర్కొన్నారు. ఈ విషయంపై తమకు ఎలాంటి ఫిర్యాదు రాలేదని ఎస్సై బాలకృష్ణ తెలిపారు.

ఇదీ చూడండి: ఆలేరు సర్పంచ్, ఉపసర్పంచ్​ల సస్పెండ్​కు కలెక్టర్​ ఆదేశం