Revanth Reddy Speech at Kollapur Public Meeting : 'తెలంగాణ ఇచ్చిన కాంగ్రెస్​కి ఒక్క అవకాశం ఇవ్వండి'

Revanth Reddy Speech at Kollapur Public Meeting : మూడోసారి ముఖ్యమంత్రి చేయాలని కేసీఆర్‌ కోరుతున్నారని.. ఆయనను మళ్లీ సీఎం చేస్తే మరో లక్ష కోట్లు దోచుకుంటారని పీసీసీ అధ్యక్షుడు రేవంత్ రెడ్డి ఎద్దేవా చేశారు. కొల్లాపూర్​లో నిర్వహించిన పాలమూరు ప్రజాభేరి సభలో ఆయన కేసీఆర్​ ప్రభుత్వంపై విరుచుకుపడ్డారు. కేసీఆర్​ను తరిమికొడితోనే రాష్ట్రం మళ్లీ అవినీతి పథం నుంచి అభివృద్ధి పథంలోకి పయనిస్తుందని చెప్పారు. జిల్లాలోని అన్ని స్థానాల్లో కాంగ్రెస్‌ అభ్యర్థులను గెలిపించాలని రేవంత్ రెడ్డి అభ్యర్థించారు.

Revanth Reddy Speech at Kollapur Public Meeting : ఇందిరాగాంధీ పేదల పాలిట దేవత అని టీపీసీసీ అధ్యక్షుడు రేవంత్​ రెడ్డి(Revanth Reddy) అన్నారు. పేదల ఆత్మగౌరవాన్ని నిలబెట్టిన ఉక్కుమహిళ అని ఆయన కొనియాడారు. చివరి రక్తపు బొట్టు వరకు దేశం కోసం తపించిన వీర వనిత వర్ధంతి సందర్భంగా నివాళులు అర్పించారు. తెలంగాణ ప్రతినిధిగా దేశ ప్రధానిగా ఇందిరాగాంధీ నాయకత్వం వహించారన్నారు. కొల్లాపూర్​ సభకు ప్రియాంకగాంధీ రావాల్సి ఉందని.. అనివార్య కారణాలతో ఆమె పర్యటన రద్దు కావడంతో రాహుల్​గాంధీ(Rahul Gandhi) హుటాహుటిన ఇక్కడకు వచ్చారని తెలిపారు. కొల్లాపూర్‌ సభ కోసం హెలికాప్టర్​లో వెళ్లడం ప్రమాదమని చెప్పినా.. రిస్క్ చేసి ఇక్కడకు వచ్చారని రేవంత్ రెడ్డి వివరించారు.

Revanth Reddy Kollapur Public Meeting Speech : తెలంగాణ రాష్టం వచ్చాక కేసీఆర్‌ కుటుంబం మాత్రమే బాగుపడిందని రేవంత్ ​రెడ్డి ఆరోపించారు. కేసీఆర్‌ కుటుంబం రూ.లక్ష కోట్లు దోపిడీ చేశారని ఫైర్ అయ్యారు. మూడోసారి ముఖ్యమంత్రి చేయాలని కేసీఆర్‌ కోరుతున్నారని.. ఆయనను మళ్లీ సీఎం చేస్తే మరో లక్ష కోట్లు దోచుకుంటారని ఎద్దేవా చేశారు. పాలమూరును పసిడి పంటల జిల్లాగా మార్చాల్సి ఉందని రేవంత్​ పేర్కొన్నారు. పాలమూరు, కల్వకుర్తి, బీమా, నెట్టెంపాడు పూర్తికాలేదని.. జిల్లాలో వలసలు ఆగలేదని.. ఆత్మహత్యలు నివారించలేదని ఆగ్రహం వ్యక్తం చేశారు.

Revanth Reddy on Telangana Congress Manifesto : పాలమూరు జిల్లా ప్రజలు కాంగ్రెస్‌ పార్టీకి అండగా నిలవాలని రేవంత్​ రెడ్డి కోరారు. జిల్లాలోని అన్ని స్థానాల్లో కాంగ్రెస్‌ అభ్యర్థులను గెలిపించాలని అభ్యర్థించారు. కాంగ్రెస్‌ వస్తే రైతుబంధు(Rythu Bandhu) నిలిచిపోతుందని ఆరోపిస్తున్నారని.. కాంగ్రెస్ వస్తే రైతుభరోసా కింద రూ.15 వేలు అందజేస్తామని పేర్కొన్నారు. ఉపాధి హామీ కూలీలకు రూ.12 వేలు ఇచ్చి ఆదుకుంటామని తెలిపారు. వ్యవసాయభూమి ఉన్న వారికి ఉచిత విద్యుత్‌, ప్రతి పేదవాడి ఇంటికి ఉచితంగా విద్యుత్‌ అందిస్తాని హామీ ఇచ్చారు.

'మూడోసారి సీఎం చేయాలని కేసీఆర్, ఆయన కుటుంబం అడుగుతోంది. ఇంకో రూ.లక్ష కోట్లు దోచుకోవడానికా కేసీఆర్.. మూడోసారి అధికారం ఇవ్వమంటున్నారు?. మళ్లీ బీఆర్​ఎస్ అధికారంలోకి వస్తే రాష్ట్రాన్ని కొల్లగొడతారు. తెలంగాణ ఇచ్చిన కాంగ్రెస్​కి ఒక్క అవకాశం ఇవ్వండి. రాష్ట్రంలో కాంగ్రెస్​ను అధికారంలోకి తెచ్చి తెలంగాణ కల సాకారం చేసిన సోనియమ్మ రుణం తీర్చుకుందాం. పాలమూరు జిల్లాలో 14కు 14 గెలిపించాల్సిన బాధ్యత ఇక్కడి ప్రజలపై ఉంది. పాలమూరు పసిడి పంటల జిల్లాగా మారాలంటే కాంగ్రెస్ అధికారంలోకి రావాలి. మీ వాడిగా మీ బిడ్డగా అడుగుతున్నా.. జిల్లాలో కాంగ్రెస్ పార్టీని గెలిపించాలని కోరుతున్నా. సోనియమ్మ ఇచ్చిన ఆరు గ్యారంటీలు ప్రతీ ఇంటికి చేరాలి. ఇందిరమ్మ రాజ్యంలోనే పేదలకు సంక్షేమ ఫలాలు అందుతాయి.' -రేవంత్​ రెడ్డి, పీసీసీ అధ్యక్షుడు

Revanth Reddy on Telangana Assembly Elections : ఇందిరమ్మ ఇళ్ల కింద ప్రతి పేదకు రూ.5 లక్షలు అందిస్తామని పేర్కొన్నారు. చేయూత పథకం కింద రూ.4 వేల పింఛన్‌ ఇవ్వాలని నిర్ణయించినట్లు చెప్పారు. పథకాలు అమలు కావాలంటే తెలంగాణలో ఇందిరమ్మ రాజ్యం రావాలని సూచించారు. బీఆర్ఎస్ అభ్యర్థిపై కాంగ్రెస్‌ నేతలు దాడి చేశారని ఆరోపిస్తున్నారని.. తాము దాడులు చేయదలుచుకుంటే బీఆర్ఎస్ నేతలు(BRS Leaders) నిలబడరని ధ్వజమెత్తారు. కాంగ్రెస్‌పై నెపం నెట్టి తప్పులు కప్పిపుచ్చుకోవాలని యత్నస్తున్నారని రేవంత్​ ఆరోపించారు.