నాగర్కర్నూల్ జిల్లాలో కొల్లాపూర్ మండలం ఎల్లూరులో కల్వకుర్తి ఎత్తిపోతల పథకం మొదటి లిఫ్ట్ లో నీట మునిగిన పంప్హౌజ్ పునరుద్ధరణ పనులు శరవేగంగా కొనసాగుతున్నాయి. పంప్హౌజ్ నుంచి నీటిని తోడివేసేందుకు అధికారులు 300 హెచ్పీ మోటార్లను రెండింటినీ సిద్ధం చేశారు. డీ వాటరింగ్ ప్రక్రియ కొనసాగుతోంది. నిన్నటి వరకు 30, 40 హెచ్పీ మోటార్లతో తాత్కాలికంగా నీటిని ఎత్తిపోశారు. పంప్హౌజ్లో ప్రస్తుతం సుమారు 45 నుంచి 50 మీటర్ల మేర ప్రస్తుతం నీరు నిలిచి ఉంది. నీటి ఎత్తిపోత ప్రక్రియకు కనీసంగా 7 నుంచి 10 రోజుల సమయం పట్టే అవకాశం ఉంది.
అన్నింటికీ ఒకే సమాధానం!
నీటిని ఎత్తిపోస్తే తప్ప ప్రమాదం ఎందుకు జరిగింది? పంప్ హౌజ్లోకి నీళ్లు ఎందుకు వచ్చాయన్న విషయాలని చెప్పలేమని నీటి పారుదలశాఖ అధికారులు చెబుతున్నారు. నీటిని ఎత్తిపోసిన తర్వాత కూడా, మోటార్లు సరిగా ఉన్నాయా? లేదా? ఏవైనా మరమ్మత్తులు అవసరమా? ప్రారంభిస్తే ఎలాంటి ఇబ్బందులు తలెత్తుతాయి? ముందుగానే సరిచూసుకుని వాటిని ఆరబెట్టి తిరిగి ప్రారంభించాల్సి ఉంటుంది. సమస్య తెలుసుకుని మరమ్మత్తులు చేపట్టాడనికి కనీసంగా 15 నుంచి 20 రోజుల సమయం పట్టేలా ఉంది.
అనవసర రాద్ధాంతం
ఎల్లూరు పంపుహౌజ్ను ప్రభుత్వ విప్ గువ్వల బాలరాజు, నాగర్కర్నూల్ శాసనసభ్యుడు మర్రి జనార్దన్ రెడ్డి, కొల్లాపూర్ శాసనభ్యుడు బీరం హర్షవర్ధన్ రెడ్డి సందర్శించారు. నీట మునిగిన పంప్హౌజ్ను పరిశీలించారు. నీటిని ఎత్తిపోయడానికి ఎంత సమయం పడుతుందో అధికారులను అడిగి తెలుసుకున్నారు. ప్రమాదానికి కారణమేంటో తెలియకుండానే ప్రతిపక్షాలు అనవసర రాద్ధాంతం చేస్తున్నాయని గువ్వల బాలరాజు మండిపడ్డారు. పంప్హౌజ్ నీటమునిగి తాగు, సాగునీటికి ఇబ్బంది తలెత్తినందున... విపక్షాలు ప్రభుత్వానికి అండగా నిలబడి సలహాలు, సూచనలు ఇవ్వాలే తప్ప... రాజకీయం చేయడం సమంజసం కాదని హితవు పలికారు. రైతులు, ప్రజలు ఎలాంటి ఆందోళనకు గురికావాల్సిన అవసరం లేదని... నెల రోజుల్లో పంప్హౌజ్ను పునరుద్ధరించి ఒక్క మోటారు ద్వారానైనా నీటి ఎత్తిపోత ప్రారంభిస్తామని ధీమా వ్యక్తం చేశారు. ముఖ్యమంత్రి కేసీఆర్ ఆదేశాల మేరకు అధికారులకు 24 గంటలు శ్రమిస్తున్నారని తెలిపారు.
144 సెక్షన్
ఎల్లూరు పంప్హౌజ్ వద్ద 144 సెక్షన్ కొనసాగుతోంది. నీటిని ఎత్తిపోసే ప్రక్రియ సహా పునరుద్ధరణ చర్యలకు ఎలాంటి అంటకం కలగకుండా నీటి పారుదల, ప్రాజెక్టు అధికారులు మినహా ఎవరనీ లోపలకి అనుమతించడం లేదు. పంప్హౌజ్ నీట మునగడానికి ప్రభుత్వమే బాధ్యత వహించాలని డిమాండ్ చేస్తూ... సీపీఎం నిరసనకు దిగింది. పాదయాత్రగా ఎల్లూరు లిఫ్ట్ వద్దకు వెళ్లేందుకు సిద్ధమైన సీపీఎం శ్రేణుల్ని కొల్లాపూర్ లోనే పోలీసులు అదుపులోకి తీసుకున్నారు. పంప్ హౌజ్ వద్దకు అనుమతించకోవడంపై విపక్షాలు తీవ్ర ఆగ్రహం వ్యక్తం చేస్తున్నాయి.
ఇదీ చూడండి: ఎల్లూరు పంప్ హౌజ్ మునకతో తాగు, సాగు నీటి కష్టాలు
