నాగర్ కర్నూల్ జిల్లా కొల్లాపూర్ మండలం ఎల్లూరు వద్ద కేఎల్ఐ ప్రాజెక్టులో గాలి బయటకు వెళ్లలేకపోవడం వల్లే మూడో మోటార్ పేలిపోయిందని క్షేత్ర స్థాయి అధికారులు గుర్తించినట్లు తెలిసింది. పేలుడు ధాటికి మోటార్ దెబ్బ తినడం వల్ల విడి భాగాలు చెల్లాచెదురుగా పడి ఉన్నట్లు అధికారులు గుర్తించారు.
గత నెల 16న మిషన్ భగీరథ పథకానికి ఎల్లూరు నుంచి నీటిని అందించడానికి పంప్హౌస్లో మూడో మోటార్ను ప్రారంభించిన కొద్ది నిమిషాల్లోనే పెద్ద శబ్దంతో పేలి పోయింది. ఫలితంగా సర్జ్పూల్ నుంచి పంప్హౌస్లోకి నీరు చేరి.. మోటార్లు పూర్తిగా నీట మునిగాయి. ఈ క్రమంలో నీటిని తోడివేసిన అనంతరం స్థానిక క్షేత్ర స్థాయి అధికారులు పరిస్థితిని పరిశీలించారు.
సాధారణంగా నీటి ఎత్తిపోతలు ప్రారంభించే క్రమంలో సిబ్బంది మొదట కంప్యూటర్ ద్వారా గాలిని బయటకు పంపించాలి. గాలి సక్రమంగా బయటకు పోకపోవడం వల్లే మూడో మోటార్ను ప్రారంభించిన కొద్ది నిమిషాల్లోనే పేలి పోయిందని అధికారులు నిర్ధరణకు వచ్చినట్లు సమాచారం. అధికారికంగా మాత్రం ఆ వివరాలు వెల్లడించలేదు. నిపుణులు వచ్చి పరిశీలించిన తర్వాతే పరిస్థితి కొలిక్కి వచ్చే అవకాశం ఉంది.
మరోవైపు మిషన్ భగీరథ పథకానికి నీరు అందించేందుకు గానూ ఐదో మోటార్ను సిద్ధం చేసేందుకు అధికారులు చర్యలు తీసుకుంటున్నారు. ఈనెల 20 నుంచి ఐదో మోటార్తో నీటిని తోడి.. ప్రారంభిస్తామని ప్రాజెక్టు అధికారులు ఉన్నతాధికారులకు నివేదించారు. ప్రాజెక్టులో ఏ సమస్య ఉన్నా.. ఇంజినీరింగ్ అధికారులకు మాత్రమే తెలియాలని ఎలాంటి సమాచారం బయటకు చెప్పొద్దని ఉన్నతాధికారులు ఆదేశాలు ఇచ్చినట్లు సమాచారం. ఈ క్రమంలోనే కేఎల్ఐ ప్రాజెక్టు వద్ద పోలీస్ పికెటింగ్ కొనసాగుతోంది. కొత్త వ్యక్తులను పంప్హౌస్లోనికి అనుమతించడం లేదు.
