రైతు వ్యతిరేక చట్టాలు ఉపసంహరించుకోవాలి: ఎమ్మెల్యే జైపాల్ యాదవ్

దిల్లీలో రైతుల నిరసనకు మద్దతుగా నాగర్​కర్నూల్ జిల్లా కల్వకుర్తి ఆర్టీసీ డిపో ఎదుట వివిధ పార్టీల నాయకులు బైఠాయించారు. కేంద్రం తీసుకొచ్చిన రైతు వ్యతిరేక చట్టాలను వెంటనే ఉపసంహరించుకోవాలని ఎమ్మెల్యే జైపాల్ యాదవ్ డిమాండ్ చేశారు. ఈ ఆందోళనలో భాజపాయేతర పార్టీలు పాల్గొన్నాయి.

భాజపా ప్రభుత్వం రైతు వ్యతిరేక చట్టాలను తీసుకొచ్చి అన్నదాతలను మోసం చేస్తోందని... వాటిని ఉపసంహరించుకోవాలని ఎమ్మెల్యే జైపాల్ యాదవ్ డిమాండ్ చేశారు. నాగర్ కర్నూల్ జిల్లా కల్వకుర్తి పట్టణంలో నూతన వ్యవసాయ చట్టాలను వ్యతిరేకిస్తూ భారత్ బంద్​లో భాగంగా ఆర్టీసీ డిపో ఎదుట బైఠాయించారు.

దిల్లీలో రైతుల నిరసనకు మద్దతుగా బంద్ నిర్వహిస్తున్నామని, కల్వకుర్తి నియోజకవర్గంలోని అన్ని మండల కేంద్రాల్లో ధర్నాలు చేస్తున్నట్లు ఎమ్మెల్యే తెలిపారు. భాజపాయేతర శ్రేణులు బంద్​ను విజయవంతం చేయాలని ఆయన కోరారు. ఈ ఆందోళనలో తెరాస శ్రేణులు, కాంగ్రెస్, తెదేపా, వామపక్షాల నాయకులు పాల్గొన్నారు.

ఇదీ చదవండి: బంద్​కు విపక్షాల మద్దతు.. చట్టాలు ఉపసంహరించుకోవాలని డిమాండ్