పోడు భూముల వ్యవహారం ఇరువర్గాల మధ్య ఘర్షణకు దారితీసింది. గిరిజనులు సాగు చేసుకుంటున్న భూములను అటవీశాఖ సిబ్బంది అడ్డుకోగా.. వాగ్వాదం చోటు చేసుకుంది. ఈ గొడవలో ఆదివాసీలకు, అటవీసిబ్బందికి గాయాలయ్యాయి. ఈ ఘటన ములుగు జిల్లా తాడ్వాయి మండలం జలగలంచ గూడెంలో జరిగింది. జలగలంచగూడెంలో నివసిస్తున్న గుత్తికోయలు ఎన్నో ఏళ్ల నుంచి పోడు భూములపై ఆధారపడి వ్యవసాయం చేసుకుంటున్నారు. ఈరోజు ఉదయం ఓ గిరిజనుడు పొలాన్ని దున్నుతుండగా అటవీశాఖ అధికారులు అడ్డుకున్నారు. దీంతో ఇద్దరి మధ్య వాగ్వాదం తలెత్తింది. ఈ ఘర్షణలో ఒకరిపై ఒకరు కర్రలతో దాడి చేసుకున్నారు.
గిరిజనులకు గాయాలు
ఈ గొడవలో గుత్తికోయ గూడెం పెద్దమనిషి సోమయ్యతో పాటు మరికొందరికి గాయాలయ్యాయి. ఫారెస్ట్ బీట్ ఆఫీసర్ బానోత్ బాలకృష్ణ, బేస్ క్యాంప్ డ్యూటీ బీట్ ఆఫీసర్ నాగేంద్రబాబు సైతం గాయపడ్డారు. ఈ ఘటనతో గుత్తి కోయ గిరిజనులు, అటవీశాఖ అధికారులు తాడ్వాయి పోలీస్ స్టేషన్లో పరస్పరం ఫిర్యాదు చేసుకున్నారు. ఈ మేరకు పోలీసులు దర్యాప్తు చేస్తున్నారు.
పనులు చేయించుకుని మమ్మల్నే కొడుతున్నారు: గిరిజనులు
ఎన్నో ఏళ్లుగా తాము ఇక్కడ నివసిస్తున్నా కూడా అన్యాయంగా తమపై దాడులకు పాల్పడుతున్నారని ఓ గిరిజనులు ఆవేదన వ్యక్తం చేశారు. తమను అన్యాయంగా కొడుతున్నారని వాపోయారు. పొలం దున్నేందుకు వెళ్తే మమ్మల్నీ అడ్డుకుని వేధింపులకు గురి చేస్తున్నారని ఆవేదన వ్యక్తం చేశారు. తమతో అన్ని పనులు చేయించుకున్న అటవీశాఖ అధికారులు డబ్బులు కూడా ఇవ్వకుండా.. మహిళలు, పిల్లలపై సైతం దాడికి పాల్పడుతున్నారని గిరిజనులు ఆరోపిస్తున్నారు.
హరితహారం పేరిట తమతో మొక్కలు కూడా నాటించి ఇప్పటివరకు డబ్బులు ఇవ్వలేదని ఆవేదన చెందుతున్నారు. రోజు జలగలంచగూడెనికి వచ్చి చిన్న, పెద్ద తేడా లేకుండా దురుసుగా మాట్లాడుతూ.. తమపైనే దాడి చేస్తున్నారని ఆవేదన చెందుతున్నారు. అటు పోలీసులు, ఇటు అటవీశాఖ అధికారులు తమ జీవితాలతో ఆడుకుంటున్నారని ఆదివాసీలు వాపోతున్నారు. తమకు ఈ భూమి మీద బతికే హక్కు లేదా అంటూ గిరిజనులు ఆవేదన వ్యక్తం చేస్తున్నారు.
ఇదీ చూడండి: పోడు భూముల వివాదం.. అటవీ సిబ్బందితో వాగ్వాదం
