ములుగు జిల్లా వెంకటాపూర్ మండల కేంద్రంలోని ప్రాథమిక ఆరోగ్య కేంద్రాన్ని నేషనల్ కమిషన్ ఆఫ్ ప్రొటెక్షన్ ఛైల్డ్ రైట్స్ డాక్టర్ ఆర్.జి. ఆనంద్ పరిశీలించారు. గర్భిణీ స్త్రీలు, బాలింతల పట్ల ప్రత్యేక శ్రద్ధ కనబరచాలని ఆయన సూచించారు. ఆస్పత్రుల్లోనే ప్రసవాలు జరిగేలా ప్రోత్సహించాలని.. వారికి సకాలంలో సేవలందించాలన్నారు. అనంతరం 1098 ఛైల్డ్ లైన్ కార్యాలయాన్ని పరిశీలించి.. పనితీరుపై సంతృప్తి వ్యక్తం చేశారు. జిల్లా కలెక్టరేట్లోని ఆడిటోరియంలో అధికారులతో సమీక్షా సమావేశం నిర్వహించారు.
బాలల హక్కుల పరిరక్షణ కోసం ప్రతి మండలానికి ఒక బృందాన్ని నియమించి.. ప్రతివారం అవగాహన కార్యక్రమాలను నిర్వహిస్తున్నామని జిల్లా పాలనాధికారి క్రిష్ణ ఆదిత్య తెలిపారు. అన్ని శాఖల సమన్వయంతో 0 నుంచి 18 ఏళ్ల వరకు పిల్లల డేటాబేస్ రూపొందిస్తున్నామని అదనపు కలెక్టర్ ఆదర్శ్ సురభి వెల్లడించారు. ఈ కార్యక్రమంలో జిల్లా సంక్షేమాధికారి ప్రేమలత, గ్రామీణాభివృద్ధి అధికారి పారిజాతం, సీడబ్లూసీ ఛైర్మన్ పరశురాములు, ఇతర శాఖల అధికారులు పాల్గొన్నారు.
