మేడ్చల్‌-మల్కాజ్‌గిరి జిల్లా మూడుచింతలపల్లి మండలం కేశవరం గ్రామానికి చెందిన మహ్మద్‌ సుల్తాన్‌- శైనాజ్‌ దంపతులకు సానా(14), సాధియా(12) ఇద్దరు పిల్లలు. ఏడాది క్రితం తండ్రి గుండెపోటుతో మృత్యువాత పడగా.. ఆ తర్వాత కొద్ది రోజులకే తల్లి అనారోగ్యంతో కన్నుమూసింది. తల్లిదండ్రులు దూరమైన ఆ బాలికలను నాన్నమ్మ చేరదీసింది. తనకు వచ్చే వృద్ధాప్య పింఛనుతోనే వారిని పోషించింది.
కేశవరం జిల్లా పరిషత్ ఉన్నత పాఠశాలలో సానా.. 8వ తరగతి, సాధియా.. 7వ తరగతి చదువుతున్నారు. నాన్నమ్మ ఇటీవల మృతిచెందడంతో ఆ బాలికలు అనాథలయ్యారు. వారికి ఇల్లు లేకపోవడంతో ఒక పూరిపాకలోనే కాలం వెళ్లదీస్తున్నారు. వీరి పరిస్థితిని చూసి చలించిన ఆ గ్రామ సర్పంచి ఉడుతల జ్యోతిగౌడ్‌, స్థానిక నాయకులు.. కొంత ఆర్థికసాయం, నిత్యావసర సరుకులు అందించారు.
