ముఖ్యమంత్రి దత్తత తీసుకున్న మూడుచింతలపల్లిలో కోట్ల రూపాయల ప్రకటనలు తప్ప.. ఏమాత్రం అభివృద్ధి చేయలేదని ములుగు ఎమ్మెల్యే సీతక్క ఆరోపించారు. ఆ గ్రామంలో దళిత, గిరిజన ఆత్మగౌరవ దీక్షలో భాగంగా రెండో రోజు రేవంత్రెడ్డి చేస్తున్న దీక్షలో ఆమె పాల్గొన్నారు.
దళితులు, గిరిజనులు, ఆదివాసీల సమస్యలు బయటకు తీసుకువచ్చేందుకే ఈ దండోర కార్యక్రమానికి శ్రీకారం చుట్టినట్లు సీతక్క తెలిపారు. ప్రభుత్వ ప్రజావ్యతిరేక విధానాలపై ప్రజలకు చైతన్యం తీసుకొచ్చేందుకే దీక్షలు చేస్తున్నట్లు చెప్పారు. ప్రభుత్వం ఇచ్చిన పది లక్షల రూపాయలు తీసుకుంటాం.. నచ్చినోళ్లకే ఓటేస్తామని హుజూరాబాద్ ప్రజలు చెబుతున్నారని సీతక్క తెలిపారు. హుజూరాబాద్ మాదిరిగానే బీసీ, ఎస్టీ, ఆదివాసీ, గిరిజనులు, మహిళలకు రాష్ట్ర సంపద పంచాలని డిమాండ్ చేశారు. రాష్ట్రమంతా అర్హులైన దళితులకు న్యాయం చేయాలనే రేవంత్రెడ్డి దీక్ష చేస్తున్నారని సీతక్క పేర్కొన్నారు. ఆదివాసీ హక్కుల కోసం, పోడు భూముల్లో మొక్కలు పెంచుతున్న ప్రభుత్వ విధానాలపై ఎండగట్టేందుకే రేవంత్రెడ్డి దీక్ష చేస్తున్నారని స్పష్టం చేశారు.
తెలంగాణ వస్తే ఇంటికో ఉద్యమని చెప్పిన కేసీఆర్ మాట తప్పారని విమర్శించారు. ఎస్సీ, ఎస్టీ బ్యాగ్లాగ్ పోస్టులు 30 వేలకు పైగా ఖాళీగా ఉన్న.. మూడు పోస్టులనూ భర్తీ చేయలేదని ఆరోపించారు. తక్షణమే ఆయా ఖాళీలను భర్తీ చేయాలని డిమాండ్తోనే రేవంత్రెడ్డి దీక్ష చేస్తున్నారని సీతక్క తెలిపారు.
ఇంద్రవల్లిలో దళిత ఆదివాసీ దండోర పేరిట కాంగ్రెస్ కార్యక్రమం నిర్వహించిన తర్వాతనే.. సీఎంవోలో దళిత అధికారిని నియమించినట్లు సీతక్క తెలిపారు. రేవంత్రెడ్డి వెలుగులోకి తీసుకురావడంతోనే నిఘా విభాగం డీజీని మార్చారని సీతక్క పేర్కొన్నారు. మనకు కావాల్సింది ప్రభుత్వం మెడలు వంచి సాధించికుందామన్న సీతక్క.. తెలంగాణలో రానున్న రోజుల్లో కాంగ్రెస్ జెండా ఎగరబోతోందని స్పష్టం చేశారు.
ఇదీచూడండి: Revanth Reddy: మూడుచింతలపల్లిలో రేవంత్ రచ్చబండ... దళితులతో ముచ్చట
