congress political training: 'పార్టీ బలోపేతం సహా అధికారంలోకి రావటమే లక్ష్యం'

కేంద్ర, రాష్ట్ర ప్రభుత్వాల వైఫల్యాలపై ప్రజాక్షేత్రంలో పోరాటం చేసేందుకు పార్టీ శ్రేణులకు కాంగ్రెస్‌ నాయకులు దిశానిర్దేశం చేశారు (congress political training). హైదరాబాద్‌ కొంపల్లిలో జరిగిన రెండ్రోజుల శిక్షణా తరగతుల్లో.... పార్టీ బలోపేతం కోసం భవిష్యత్ కార్యాచరణ, పార్టీ భావజాలాన్ని క్షేత్రస్థాయికి తీసుకెళ్లడంపై ఎక్కువ దృష్టి సారించారు. రాష్ట్రంలో 30 లక్షలకు పైగా పార్టీ సభ్యత్వం చేయడం సహా కాంగ్రెస్‌ని అధికారంలోకి తీసుకురావడమే లక్ష్యంగా.... ప్రతి కార్యకర్త దీక్ష పూనుకోవాలని పీసీసీ అధ్యక్షుడు రేవంత్ రెడ్డి చేసిన ప్రసంగం పార్టీ క్యాడర్‌లో జోష్‌ను నింపింది.

హుజూరాబాద్‌ ఉప ఎన్నికల్లో ఘోర ఓటమితో పార్టీ క్యాడర్‌, నాయకుల్లో తీవ్ర నైరాశ్యం నెలకొంది. ఇంతటి దారుణమైన ఓటమి ఎప్పుడు చూడలేదన్న భావన పార్టీ నాయకుల్లో కూడా వ్యక్తమవుతోంది. ఈ నేపథ్యంలో కాంగ్రెస్‌ క్యాడర్‌ను, నాయకుల్లో ఉత్సాహాన్ని నింపేందుకు డిజిటల్‌ సభ్యత్వంపై (Congress Digital membership program) అవగాహన కార్యక్రమం పేరుతో టీపీసీసీ రెండు రోజులు మండల, పట్టణ, నియోజక వర్గ నాయకులకు శిక్షణ తరగతులు ఏర్పాటు చేసింది (congress political training). కొంపల్లిలోని ఓ ఫంక్షన్‌ హాలులో రెండు రోజుల పాటు జరిగిన శిక్షణా తరగతుల్లో ప్రధానంగా నాలుగు అంశాలపై పార్టీ క్యాడర్‌కు నేతలు దిశానిర్దేశం చేశారు. పార్టీ బలోపేతం కోసం భవిష్యత్ కార్యాచరణ, పార్టీ భావజాలాన్ని క్షేత్ర స్థాయికి తీసుకెళ్లేందుకు వివిధ రంగాల నిపుణులతో దిశానిర్దేశం, పార్టీ క్రమశిక్షణ, పార్టీ గీత దాటిన వారిపై వేటు, హెచ్చరికలు, కేంద్ర, రాష్ట్ర వైఫల్యాలపై ప్రజాక్షేత్రంలో పోరాటాలపై ఈ రెండు రోజుల శిక్షణా తరగతుల్లో ఎక్కువ దృష్టి పెట్టారు.

ఆధారాలు ఇచ్చేందుకు నేను సిద్ధం.. మీరు చర్యలు తీసుకుంటారా..?

రాబోయే 18 నెలలు ప్రతి కాంగ్రెస్ కార్యకర్త పార్టీ కోసం నిబద్ధతతో పనిచేసేలా శిక్షణా తరగతులలో అవగాహన కల్పించారు. ప్రస్తుత పరిస్థితుల్లో కాంగ్రెస్ అధికారంలోకి రావడం దేశానికి, రాష్ట్రానికి అవసరమని స్పష్టం చేశారు. కేంద్ర, రాష్ట్ర ప్రభుత్వాల వైఫల్యాలను క్షేత్రస్థాయికి ఎలా తీసుకెళ్లాలనే దానిపై హస్తం నేతలు అవగాహన కల్పించారు. తెరాస, భాజపా మధ్య నడుస్తున్న గొడవ...నిజమైంది కాదని...కేసీఆర్ అవినీతికి సంబంధించి పూర్తి ఆధారాలను ఇచ్చేందుకు తాను సిద్ధంగా ఉన్నానని, చర్యలు తీసుకోవడానికి భాజపా సిద్ధంగా ఉందా అని రేవంత్‌ రెడ్డి సవాల్ విసిరారు. నిరూపించలేకపోతే తాను రాజకీయాల నుంచి తప్పుకుంటానన్న రేవంత్‌ రెడ్డి...కేంద్ర మంత్రి కిషన్‌ రెడ్డి, రాష్ట్ర భాజపా అధ్యక్షుడు బండి సంజయ్‌కు ధైర్యం ఉందా అని ప్రశ్నించారు.

స్థానిక సంస్థల ఎమ్మెల్సీ ఎన్నికల్లో బరిలోకి దిగాలి

రెండో రోజు మధ్యాహ్నం సమావేశాలు ముగిసిన అనంతరం కాంగ్రెస్ రాజకీయ వ్యవహారాల కమిటీ సమావేశం కొంపల్లిలోనే జరిగింది. రాబోయే ఎమ్మెల్సీ ఎన్నికలు‌, పోడు భూముల సమస్య, జనగామ వివాదం, జనజాగరణ యాత్రలపై చర్చించారు. స్థానిక సంస్థల ఎమ్మెల్సీ ఎన్నికల్లో గట్టి పోటీ ఇవ్వగలిగిన స్థానాలలో పోటీ చేయాలని పీఏసీ సభ్యులు కోరినట్లు సమాచారం. ఎమ్మెల్సీ ఎన్నికల్లో పోటీకి సంబంధించి దామోదర, బలరాం నాయక్, చిన్నారెడ్డిలతో కూడిన కమిటీ నియమించారు. పార్టీ శిక్షణా తరగతుల్లో జనగాం డీసీసీ అధ్యక్షుడు జంగా రాఘవరెడ్డి వ్యవహరించిన తీరుపై పీఏసీ నేతలు తీవ్రంగా పరిగణించారు. ఈ వివాదంపై సుదీర్ఘంగా చర్చ జరిగిన సందర్భంగా పార్టీ గీత దాటి వ్యవహరించిన ఎవరిని కూడా ఉపేక్షించొద్దని మెజారిటీ సభ్యులు అభిప్రాయపడినట్లు తెలుస్తోంది. నేడో రేపో...క్రమశిక్షణ కమిటీ సమావేశమై ఈ వ్యవహారంపై చర్చించి నిర్ణయం తీసుకునే అవకాశం ఉందని పార్టీ వర్గాలు వెల్లడించాయి.

భవిష్యత్తులో నియోజకవర్గాల వారీగా సమీక్షలు..!

నిరుత్సాహంతో ఉన్న కాంగ్రెస్‌ క్యాడర్‌లో ఈ రెండు రోజుల శిక్షణా తరగతులు నూతనోత్సాహాన్ని నింపాయి. సమావేశానికి హాజరైన మండల, పట్టణ స్థాయి నాయకులతో పార్లమెంటు నియోజక వర్గాల వారీగా నేరుగా పీసీసీ అధ్యక్షుడు రేవంత్ రెడ్డి సమావేశం కావడం, వారికి దిశనిర్దేశం చేయడం వారిలో జోష్‌ నింపినట్లయ్యింది. క్షేత్రస్థాయి నాయకత్వం బలంగా ఉంటే పార్టీ మరింత బలోపేతం అవుతుందని భావిస్తున్న పీసీసీ అధ్యక్షుడు రేవంత్‌ రెడ్డి భవిష్యత్తులో నియోజక వర్గాల వారీగా సమీక్షలు నిర్వహించాలని భావిస్తున్నట్లు తెలుస్తోంది.

ఇదీ చూడండి: Revanth Reddy on CM KCR: సీబీఐ విచారణ వేయించండి.. కేసీఆర్‌ అవినీతిని నిరూపిస్తా: రేవంత్‌