విద్యార్థులకు జేఈఈ, నీట్ ప్రవేశ పరీక్షలు నిర్వహిస్తామన్న కేంద్ర నిర్ణయాన్ని నేషనల్ కాంగ్రెస్ పార్టీ తప్పుపట్టింది. ఈ మేరకు నేడు దేశ వ్యాప్తంగా అన్ని ప్రభుత్వ కార్యాలయాల ముందు నిరసన కార్యక్రమాలు చేపట్టింది. ఈ నేపథ్యంలో కూకట్పల్లిలో పలువురు కాంగ్రెస్ నేతలు స్థానిక తహసీల్దార్ కార్యాలయం ఎదుట ధర్నాకు దిగారు. అనంతరం తహసీల్దర్కు వినతి పత్రం అందజేశారు.
కరోనాతో ఓ వైపు దేశ ప్రజలు ప్రాణాలు కోల్పోతుంటే.. వారిని రక్షించకుండా నిర్లక్ష్యం వహిస్తున్నారని నేతలు ఆరోపించారు. ప్రజల ప్రాణాలతో చెలగాటమాడితే సహించేది లేదని మండిపడ్డారు. జేఈఈ, నీట్ పరీక్షలు నిర్వహించాలని మోదీ ప్రభుత్వం తీసుకున్న నిర్ణయాన్ని వెంటనే ఉపసంహరించుకోవాలని డిమాండ్ చేశారు. కార్యక్రమంలో పార్టీ సీనియర్ నాయకులు వెంగల్ రావు, గాలి బాలాజీ, గంధం రాజు, సుభాష్, యూత్ కాంగ్రెస్ నాయకులు మొయిజ్, ఆసీఫ్ తదితరులు పాల్గొన్నారు.
