ఇంటికి వెళ్లాల్సిన వైద్యుడు... నేరుగా అనంతలోకాలకు...

ప్రాణాలు పోసే వైద్యుడు అతను... కానీ తన ప్రాణాన్ని మాత్రం కాపాడుకోలేకపోయాడు. ఆస్పత్రిలో సేవలందించి ఇంటికి పయనమైన ఆ డాక్టర్... అనంతలోకాలకు వెళ్లిపోయాడు. గుర్తు తెలియని ఓ మృత్యుశకటం చేసిన ప్రమాదం నుంచి... తాను ఎంతో మందిని రక్షించిన పుణ్యమే కాదు అతను ధరించిన శిరస్త్రాణమూ ఆ వైద్యున్ని రక్షించలేకపోయింది.

మేడ్చల్ జిల్లా గుండ్లపోచంపల్లి వద్ద ఘోర రోడ్డు ప్రమాదం జరిగింది. మాజీ సర్పంచ్​ బండారి నరేందర్​ చిన్న కుమారుడు డా.యశ్వంత్​ జీడిమెట్లలోని ఓ ఆస్పత్రిలో విధులు నిర్వర్తిస్తున్నాడు. విధులు ముగించుకుని ద్విచక్రవాహనంపై ఇంటికి వెళ్తున్న క్రమంలో ఓ గుర్తుతెలియని వాహనం ఢీకొంది. ప్రమాదంలో యశ్వంత్​కు తీవ్ర గాయాలై అక్కడికక్కడే మృతి చెందాడు. దిగ్భ్రాంతి కలిగించే విషమేంటంటే... వైద్యుడు శిరస్త్రాణం ధరించినా ఫలితం లేకపోయింది. హెల్మెట్​ ముక్కలుముక్కలైంది. మృతదేహాన్ని చూసి అతని తల్లి రోధిస్తుంటే... అందరి కళ్లు చమర్చాయి. కేసు నమోదు చేసుకున్న పోలీసులు మృతదేహాన్ని శవపరీక్ష నిమిత్తం గాంధీ ఆస్పత్రికి తరలించారు. ప్రమాదానికి కారణమైన వాహనాన్ని వెతికే పనిలో పడ్డారు.

ఇవీ చూడండి: ఏటీఎంలలో స్కిమ్మింగ్ యంత్రాలు.. విదేశీయుల అరెస్ట్..