ఉమ్మడి మహబూబ్నగర్ జిల్లా వ్యాప్తంగా బాణాసంచాపై ఏటా రూ. 12 కోట్ల వ్యాపారం జరుగుతుంది. వ్యాపారులు, షెడ్డు, పందిళ్ల నిర్వాహకులు, లైటింగ్‌ యజమానులు, నీటి వ్యాపారులు దీపావళి సందర్భంగా ఉపాధి పొందుతారు. దీని ద్వారా వచ్చిన లాభాలు ఆ కుటుంబాలకు ఎంతో ఆసరాగా ఉండేవి. ఉమ్మడి జిల్లా వ్యాప్తంగా మూడు వేల మందికిపైగా పండుగ వేళ ఉపాధి పొందుతారు.
కరోనా ప్రభావం ఈ వ్యాపారాలపై పడింది. సుప్రీంకోర్టు రాత్రి 8 గంటల నుంచి 10 గంటల వరకు బాణాసంచా కాల్చేందుకు అనుమతి ఇచ్చినా.. జనాలు మాత్రం కొనుగోలు చేసేందుకు ముందుకు రావడం లేదు. ఇప్పటికే బాణాసంచా స్టాక్‌ను పూర్తి స్థాయిలో తెచ్చిపెట్టుకున్నామని, దీని ద్వారా తాము తీవ్రంగా నష్టపోవాల్సి వస్తుందని మహబూబ్నగర్ బాణసంచా దుకాణ దారులు ఆందోళన చెందుతున్నారు. గతంలో గుంపులుగా వచ్చే జనం ఈసారి తక్కువ సంఖ్యలో కనిపిస్తున్నారని వాపోయారు.
ఏటా రెండు, మూడు రోజుల పాటు జోరుగా విక్రయాలు జరిగేవి. ఈసారి శనివారం ఒక్కరోజే అమ్ముకునే అవకాశం ఉంది. అయితే జనాల్లో కరోనాపై భయాందోళనలు, నిషేధంపై సరైన సమాచారం లేక రావడం లేదని దుకాణ దారులు ఆవేదన వ్యక్తం చేస్తున్నారు.
ఇదీ చదవండి: ఆవు పేడతో ప్రమిదల తయారీ.. ఎక్కడంటే..?
