మహబూబ్నగర్ జిల్లా దేవరకద్ర మండల కేంద్రంలోని మా లక్ష్మీ రైస్మిల్ ఎదుట రైతుల మధ్య గొడవ జరిగింది. పలువురు వివిధ కొనుగోలు కేంద్రాల నుంచి సరైన అనుమతి పత్రాలు లేకుండానే నేరుగా ధాన్నాన్ని రైస్మిల్లుకు తీసుకురావడం.. లైన్లలో ఉన్నవారిని కాదని ముందుకు దూసుకుపోవడం వల్ల గొడవ ప్రారంభమైంది. గొడవను గమనించిన మిల్లర్ల యజమానులు.. ధాన్యం అన్లోడ్ చేయడాన్ని కాసేపు నిలిపివేశారు.
ఫలితంగా రైస్మిల్ ఎదుట రైతులు ఆందోళన చేపట్టారు. విషయం తెలుసుకున్న స్థానిక ఎస్సై భగవంతు గౌడు... రైతులను శాంతింపజేశారు. వరుస క్రమంలో ఉన్న ట్రాక్టర్లకు టోకెన్లను అందజేసి.. ధాన్యం సేకరించాలని మిల్లర్లకు సూచించడంతో గొడవ సద్దుమణిగింది. ఈ నేపథ్యంలో నేటి నుంచి కొనుగోలు కేంద్రాల అనుమతి పత్రాలు ఉంటేనే.. రైస్ మిల్లులకు ధాన్యాన్ని తీసుకురావాలని రైతులకు సూచించారు.
ఇదీ చదవండి: రెండో దశలో వేగంగా పల్లెలను చుట్టుముడుతున్న కరోనా
