JP NADDA IN TS: తెలంగాణలో భాజపాకి మంచి అవకాశాలు ఉన్నాయని ఆ పార్టీ జాతీయాధ్యక్షుడు జేపీ నడ్డా తెలిపారు. కేసీఆర్ సర్కార్ అవినీతిపై నాయకులంతా నిలదీయాలని సూచించారు. అలాగే కేంద్ర ప్రభుత్వ పథకాలపై ప్రజలకు అవగాహన కల్పించాలని వెల్లడించారు. మహబూబ్నగర్లో నిర్వహించిన భాజపా పదాధికారుల సమావేశంలో ఆయన మాట్లాడారు. బూత్ స్థాయి నుంచి పార్టీ విస్తరణకు ప్రతి ఒక్కరూ కృషి చేయాలని జేపీ నడ్డా సూచించారు. దళిత బస్తీలకు వెళ్లి వారి సమస్యలు తెలుసుకోవాలని వివరించారు.
నెలరోజుల ప్రణాళిక అవసరం: యువమోర్చా, యువజన సంఘాలు, స్పోర్ట్స్ పర్సన్స్తో మాట్లాడాలని తెలిపారు. మహిళా మోర్చా స్వయం సహాయక బృందాలతో సమావేశాలు ఏర్పాటు చేయాలని జేపీ నడ్డా దిశానిర్దేశం చేశారు. నేను పార్టీ కోసం పనిచేస్తున్నాను అని కాకుండా.. పార్టీ నాకు పనిచేసే అవకాశం ఇచ్చిందని ఫీల్‌ కావాలని నేతలకు వివరించారు. ముందస్తు ప్రణాళిక లేకుండా జిల్లా పర్యటనలు చేయకండని నడ్డా సూచించారు. ఏం మాట్లాడాలో ముందే సన్నద్ధం కావాలని.. కేసీఆర్ సర్కార్ అవినీతి, కేంద్ర ప్రభుత్వ పథకాలపై మాట్లాడాలంటే నెల రోజుల ముందే నిర్ణయించుకోవాలని తెలిపారు.
ఒకరినొకరు పోల్చుకోవద్దు: తెలంగాణలో కొత్త వారు పార్టీలో చేరేందుకు సుముఖంగా ఉన్నారని.. అలాంటి వారిని ఆహ్వానించాలని స్పష్టం చేశారు. పార్టీలో ప్రాధాన్యతపై ఇంకొకరితో పోల్చుకోవద్దని.. ఇలాంటి అవకాశం మరోసారి రాదని తెలిపారు. కష్టపడి పనిచేసి పార్టీని క్షేత్రస్థాయిలోకి తీసుకెళ్లాలని పార్టీ అధ్యక్షుడిగా మీకు విజ్ఞప్తి చేస్తున్నానని వెల్లడించారు. అందరితో మీ కన్నా బలమైన నేతలను పార్టీలోకి తీసుకొచ్చేలా పనిచేయాలని నేతలకు దిశానిర్దేశం చేశారు. భాజపాకు దేశంలో ఏ పార్టీ సాటికాదని.. దేశంలోని కాంగ్రెస్తో సహా అన్ని పార్టీలూ కుటుంబ పార్టీలేనని జేపీ నడ్డా విమర్శించారు.
ఇవీ చూడండి:Bandi Sanjay Praja Sangrama Yatra: 'రాహుల్.. ఏ ముఖం పెట్టుకుని ఓయూకు వెళ్తావ్?'
