మహబూబ్నగర్ జిల్లా కేంద్రంలోని వన్‌టౌన్‌ పోలీస్స్టేషన్లో అవినీతి నిరోధక శాఖ అధికారులు దాడులు నిర్వహించారు. ఇసుక రవాణా చేసే ట్రాక్టర్ యజమాని నుంచి 17 వేలు లంచం తీసుకుంటూ కానిస్టేబుల్‌ పట్టుబడ్డాడు. వెంకటాపూర్‌ గ్రామానికి చెందిన ముడావత్‌ రమేశ్‌ నిబంధనలకు అనుగుణంగానే ఇసుక తరలిస్తున్నప్పటికీ శుక్రవారం తిరుపతిరెడ్డి అతడిని అడ్డుకున్నాడు. రూ. 17,000 ఇస్తేనే ట్రాక్టరును విడిచిపెడతానని బెదిరించాడు. లేదంటే తప్పుడు కేసులను బనాయిస్తానని భయబ్రాంతులకు గురిచేశాడు. తిరుపతిరెడ్డి వైఖరితో విసిగిపోయిన రమేశ్‌ ఏసీబీ అధికారులను సంప్రదించి వలపన్నారు.
శుక్రవారం సాయంత్రం సాక్షాత్తు పోలీసుస్టేషన్ ఆవరణలోనే రమేష్‌ వద్ద తిరుపతిరెడ్డి డబ్బు వసూలు చేశాడు. ఆ సొమ్ము తీసుకుని స్టేషనులోకి కానిస్టేబుల్‌ అడుగుపెట్టగానే ఏసీబీ అధికారులు పట్టుకున్నారు. నిందితుని నుంచి నగదు స్వాధీనం చేసుకున్నారు. ఇందులో మిగతా అధికారులకు ఏమైనా సంబంధం ఉందా? అని అడిగితే.. ఎవరికీ సంబంధం లేదని, తానే తీసుకున్నానని అంగీకరించాడు. ఇసుక వ్యాపారుల నుంచి తిరుపతిరెడ్డి చాలా రోజులుగా మామూళ్ల దందా సాగిస్తున్నాడని ఏసీబీకి ఫిర్యాదు చేసినట్లు ఇసుక వ్యాపారి రమేశ్‌ తెలిపారు. రెండేళ్లుగా విధిలేక తానే ఎన్నోసార్లు అతడికి డబ్బులు ఇచ్చానని చెప్పారు. నిబంధనలకు అనుగుణంగానే ఇసుక సరఫరా చేస్తున్నప్పటికీ లంచాల పేరుతో వేధించడం వల్ల విసిగి ఏసీబీని ఆశ్రయించానని తెలిపారు. మరి ఇలాంటి కానిస్టేబుల్‌ని ‘ఉత్తమ’ అవార్డుకు ఎలా ఎంపిక చేశారా అని జనం అవాక్కవుతున్నారు.
ఇదీ చూడండి : 'కోర్టుకెక్కి ఉద్యోగం తెచ్చుకున్నాడు'
