వాగులో చిక్కుకున్న రైతులు.. కాపాడిన తండావాసులు

రాష్ట్రంలో కురుస్తోన్న భారీ వర్షాల కారణంగా వాగులు, వంకలు ఉద్ధృతంగా ప్రవహిస్తున్నాయి. ఈ క్రమంలో మహబూబాబాద్​ జిల్లా మొదగులగడ్డ తండాలో ఇద్దరు రైతులు వాగు దాటేందుకు ప్రయత్నించి.. అందులోనే చిక్కుకుపోయారు. అదృష్టవశాత్తు స్థానికులు సకాలంలో స్పందించడం వల్ల ప్రాణాలతో బయటపడ్డారు.

మహబూబాబాద్ జిల్లా డోర్నకల్ మండలం మొదగులగడ్డ తండాకు చెందిన అంగోతు బాబు, దారావత్ సిరియా అనే ఇద్దరు రైతులు.. వ్యవసాయ భూమిలోని విద్యుత్ మోటారును తీసుకురావడానికి ఆకేరు వాగు దాటేందుకు వెళ్లారు. కొంత వరకు వెళ్లాక.. వరద ప్రవాహం ఒక్కసారిగా పెరిగింది. ఫలితంగా రైతులిద్దరూ వాగు మధ్యలో చిక్కుకుపోయారు.

విషయం తెలుసుకున్న తండావాసులు హుటాహుటిన వాగు వద్దకు చేరుకున్నారు. తాళ్ల సాయంతో రైతులిద్దరినీ వాగులోంచి బయటకు లాగారు. ఎలాంటి ప్రాణనష్టం జరగకపోవడం వల్ల అంతా ఊపిరి పీల్చుకున్నారు.