యూరియా కోసం రోడ్డెక్కిన రైతన్నలు

మహబూబాబాద్‌లో రైతులు యూరియా కోసం రాస్తారోకో చేశారు. గత పదిహేను రోజులుగా యూరియా కోసం పడిగాపులు కాస్తున్నా అధికారులు పట్టించుకోవడం లేదని ఆగ్రహం వ్యక్తం చేశారు. ధర్నాతో వాహనాలు నిలిచిపోయాయి. విషయం తెలుసుకున్న అధికారులు ఘటనా స్థలానికి చేరుకుని రైతులకు వెంటనే ఎరువులు మంజూరు చేస్తామని హామీ ఇవ్వగా ఆందోళన విరమించారు.

యూరియా బస్తాలను అందించాలంటూ మహబూబాబాద్ జిల్లా కేంద్రంలోని ముత్యాలమ్మ గుడి సెంటర్ వద్ద రైతులు రాస్తారోకో చేపట్టారు. వెంటనే యూరియా బస్తాలు అందించాలంటూ... నినాదాలు చేశారు. దీంతో ఇరు వైపులా వాహనాలు నిలిచిపోయాయి. విషయం తెలుసుకున్న పట్టణ సీఐ రవికుమార్, వ్యవసాయ అధికారి తిరుపతిరెడ్డిలు రాస్తారోకో వద్దకు వచ్చారు. యూరియా బస్తాల కొరత లేదని తెలిపారు. రబీ పంట కోసం యూరియా దాచుకుంటున్నారని జిల్లా వ్యవసాయ అధికారి పత్రికకు తెలిపిన సమాచారంపై నిలదీశారు.
యూరియా బస్తాలను వెంటనే అందిస్తామని వ్యవసాయ అధికారి హామీని ఇవ్వగా రైతులు రాస్తారోకోను విరమించారు.

ఇదీ చూడండి: పద్దులకు శాసనసభ ఆమోదం...