కుమురం భీం ఆసిఫాబాద్ జిల్లాలో మావోయిస్టులు సంచరిస్తున్నారన్న సమాచారంతో జిల్లా కేంద్రానికి చేరుకున్న డీజీపీ మహేందర్ రెడ్డి తిరిగి హైదరాబాద్ పయనమయ్యారు. ఆదిలాబాద్ ఎస్పీ విష్ణు వారియర్, రామగుండం సీపీ సత్యనారాయణలతో కలిసి ప్రాణహిత నది పరివాహక ప్రాంతంతో పాటు.. ఉమ్మడి ఆదిలాబాద్ జిల్లా అటవీ ప్రాంతంలో ఏరియల్ సర్వే నిర్వహించారు. హెలికాప్టర్ ద్వారా ఏరియల్ సర్వే చేసిన అనంతరం ఆయన ఆసిఫాబాద్ ఎస్పీ కార్యాలయానికి వచ్చారు. సెప్టెంబర్ 2 నుంచి 6 వరకు ఆయన ఎస్పీ క్యాంపు కార్యాలయంలోనే బస చేశారు. క్యాంపు కార్యాలయం నుంచి బయటకు రాకుండా పోలీసు ఉన్నతాధికారులతో సమీక్షా సమావేశాలు నిర్వహించారు. సెప్టెంబర్ 4న జిల్లాలోని మారుమూల అటవీ ప్రాంతమైన తిర్యాని పోలీస్ స్టేషన్ను డీజీపీ సందర్శించారు. అక్కడి పోలీసులతో ప్రత్యేకంగా సమావేశమయ్యారు.
గత ఐదురోజులుగా డీజీపీ మీడియాతో మాట్లాడడానికి నిరాకరించారు. పర్యటన చివరి రోజు కూడా మీడియాకు సమయం ఇవ్వకుండానే రోడ్డు మార్గాన హైదరాబాద్ బయలుదేరారు. ఐదు రోజుల పాటు నిర్వహించిన సమీక్షా సమావేశాల వివరాలను పోలీసులు చాలా గోప్యంగా ఉంచారు. కాగా.. కుమురం భీం జిల్లాలో డీజీపీ ఐదు రోజుల పర్యటన ముగిసినట్టే అని పలువురు అభిప్రాయపడుతున్నారు.
ఇదీ చదవండి: కరోనా పంజా: దేశంలో ఒక్కరోజే 90,632 కేసులు
