కరీంనగర్ జిల్లా గంగాధర మండలం కొండపల్లిలో కాళేశ్వరం ప్రాజెక్టు మూడో టీఎంసీ కాలువ భూసేకరణను గ్రామస్థులు బహిష్కరించారు. గ్రామసభకు హాజరైన అదనపు కలెక్టర్ శ్యాం ప్రసాద్కు వ్యతిరేకంగా నినాదాలు చేశారు. ఎకరానికి కోటి రూపాయల పరిహారంతో పాటు ప్రభుత్వ ఉద్యోగం కల్పించాలని డిమాండ్ చేశారు. ప్రభుత్వం పరిహారం ప్రకటించనంతవరకు సర్వే చేపట్టవద్దని నిరసన తెలిపారు.
'భూసేకరణను బహిష్కరించాం. వరి వేస్తే ఉరి అని చెబుతున్న ప్రభుత్వం మూడో టీఎంసీని ఏ రైతులకు మేలు చేయడం కోసం తీసుకెళ్తున్నారు. ప్రజలను భయబ్రాంతులకు గురి చేస్తున్నారు. భూమిల్ని గుంచేసుకుంటాం.. చట్టం ప్రకారం పరిహారం ఇస్తామంటున్నారు. ఎంతో విలువైన భూములను ఎకరాకు 9 లక్షలకు గుంజుకోవాలని చూస్తే ప్రజాపోరాటం చేస్తాం.' - ఉప్పు లింగయ్య, రైతు
'ప్రాణహిత-చేవెళ్ల ప్రాజెక్టు రీడిజైన్లో మూడో టీఎంసీ ప్రస్తావన లేదు. ఈ లేని అదనపు కాలువ నిర్మాణం కోసం రైతుల భూములను ప్రభుత్వం గుంజుకోవాలని చూస్తోంది. ఇది రైతుల ప్రయోజనం కోసం చేస్తున్న కాలువ కాదు. కేవలం కాంట్రాక్టు, ప్రభుత్వంలోని కొందరు పెద్దల లబ్ధి కోసం చేస్తున్న ప్రాజెక్టు. దీని పూర్తి స్థాయిలో వ్యతిరేకిస్తున్నాం. మూడో టీఎంసీకి కేంద్రం, ఎన్జీటీ అనుమతులు లేవు. బలవంతంగా భూములను గుంజుకోవాలని చూస్తే రైతుల ఆగ్రహాన్ని చూడాల్సి వస్తుంది.' -మేడిపల్లి సత్యం, టీపీసీసీ అధికార ప్రతినిధి
టీపీసీసీ అధికార ప్రతినిధి మేడిపల్లి సత్యం ఆధ్వర్యంలో గ్రామస్థులు వెళ్లిపోవడంతో గ్రామ సభను ముగించారు.
సంబంధం కోసం వెతుకుతున్నారా? తెలుగు మాట్రిమోనిలో రిజిస్ట్రేషన్ ఉచితం!
