కరోనా వైరస్కు వ్యాక్సిన్ తయారు కావటం సంతోషకరమని వైద్యారోగ్యశాఖ మంత్రి ఈటల రాజేందర్ పేర్కొన్నారు. కరీంనగర్‌ జిల్లా హుజూరాబాద్‌లో సోమవారం ఆయన పర్యటించారు. ఈ సందర్భంగా హుజూరాబాద్‌ మున్సిపల్‌ కార్యవర్గ సర్వసభ్య సమావేశంలో మంత్రి పాల్గొన్నారు.
కరోనా మహమ్మారి ప్రపంచ మానవాళిని భయభ్రాంతులకు గురి చేసిందని మంత్రి పేర్కొన్నారు. హైదరాబాద్ గడ్డ మీద ఈ వైరస్కు వ్యాక్సిన్ తయారు కావటం గర్వకారణమన్నారు. రాష్ట్రానికి కేటాయించిన ఆ వ్యాక్సిన్ మొదటగా వైద్యులు, నర్సింగ్‌ సిబ్బంది, పారిశుద్ధ్య కార్మికులు, వైద్య సిబ్బందికి అందిస్తామని తెలిపారు. ఆ తర్వాత పోలీసులతోపాటు ఇతర రంగాలకు ప్రాధాన్యమిస్తామన్న మంత్రి.. నిరుపేదలకు వ్యాక్సిన్ను ఉచితంగా ఇచ్చేందుకు ప్రయత్నిస్తామని వివరించారు.
సంతోషకరం..
రానున్న జనవరి కల్లా వ్యాక్సిన్ పూర్తి స్థాయిలో అందుబాటులోకి వస్తుందని మంత్రి ఆశాభావం వ్యక్తం చేశారు. అన్ని స్థాయిల ఆసుపత్రుల్లో ఈ వ్యాక్సిన్ ఇచ్చే ఏర్పాట్లు చేస్తామని తెలిపారు. మన దగ్గర తయారు చేసిన వ్యాక్సిన్ను ప్రపంచ మానవాళికి అందజేయటం సంతోషకరమని అన్నారు. వ్యాక్సిన్ను తయారు చేస్తున్న భారత్ బయోటెక్ను ఇటీవలే ప్రధాని మోదీ సందర్శించారన్న మంత్రి.. త్వరలోనే 80 దేశాలకు చెందిన ప్రముఖులు హైదరాబాద్‌కు వచ్చి పరిశీలించనున్నారని స్పష్టం చేశారు.
