జమ్మికుంట పోలీస్‌స్టేషన్‌లో ఆహ్లాదకరమైన వాతావరణాన్ని కల్పించేందుకు అక్కడి సిబ్బంది అహర్నిశలు కృషి చేస్తుంటారు. ఠాణాలోకి అడుగుపెట్టడంతోనే చెట్లు, పూలమొక్కలు సాదరంగా ఆహ్వానం పలుకుతాయి. ఒకవైపు పచ్చని పూలచెట్లు, మరోవైపు చిన్నారులు ఆడుకొనే ఆటవస్తువులు. పిల్లల కోసం ప్రత్యేక పార్కు కనిపిస్తుంది. దివ్యాంగులు నేరుగా మెట్లు ఎక్కలేరనే ఉద్దేశంతో ప్రత్యేక కుర్చీని ర్యాంపును కూడా ఏర్పాటు చేశారు. ఠాణాలోకి వెళ్లినట్లు కాకుండా బంధువుల ఇంటికి వెళ్లామనే అనుభూతి కలుగుతుంది.
జాతీయస్థాయిలో ర్యాంక్...
కేంద్ర హోం మంత్రిత్వ శాఖ ఆధ్వర్యంలో దేశవ్యాప్తంగా ఉన్న 16,671 పోలీస్ స్టేషన్లలో 10 ఉత్తమ పోలీస్స్టేషన్లను ఎంపిక చేయగా జమ్మికుంట పీఎస్ 10వ స్థానాన్ని దక్కించుకుంది. 2017 ఆగస్ట్ నెలలో మోడల్‌ ఠాణాగా ఎంపిక చేశారు. స్టేషన్‌కు అన్ని మౌలిక వసతులు కల్పించారు. 100 శాతం సీసీ కెమెరాలు... పట్టణంతో పాటు స్టేషన్‌ పరిధిలో ఉన్న అన్ని గ్రామాల్లో 100 శాతం సీసీ కెమెరాలను ఏర్పాటు చేసే విధంగా పోలీసులు... గ్రామస్థులను ప్రోత్సహించారు.
భేష్...
ఠాణా నిర్వహణను సమర్థంగా కొనసాగిస్తూ ప్రజలతో భేష్ అనిపించుకుంటున్నారు. ప్రజలతో మర్యాదగా మాట్లాడుతూ వారి నుంచి ఫిర్యాదులు స్వీకరించడం, చట్ట పరిధిలో వాటిని పరిశీలించడం ఇక్కడి పోలీసుల ప్రత్యేకత. ఫిర్యాదుదారులు నిరక్షరాస్యులైనా వారి ఆర్జీలు రాయడానికి ప్రత్యేక సిబ్బందిని నియమించారు.
ఆధునిక సాంకేతికత...
సాంకేతిక పరిజ్ఞానంతో దొంగతనాలు, మహిళలపై అఘాయిత్యాలపై ఉక్కుపాదం మోపుతున్నారు. దొంగతనాల కేసులను విచారించేందుకు ఆధునిక సాంకేతికతను ఉపయోగిస్తున్నారు. పట్టణంలోకి ప్రవేశం నుంచి పట్టణం దాటే వరకు కూడా ప్రతి ఒక్కరి వివరాలు సీసీ కెమెరాల్లో నిక్షిప్తం చేస్తున్నారు. ప్రతిక్షణం ఏ వీధిలో ఏం జరుగుతుందో సీసీ కెమెరాల ద్వారా పోలీసులు ఎప్పటికప్పుడు పర్యవేక్షిస్తుంటారు. సీసీ కెమెరాల సహాయంతో దొంగలను చాకచక్యంగా పట్టుకొని వారి నుంచి చోరీ సొత్తును రికవరీ చేస్తున్నారు.
ఎంతో వ్యత్యాసం...
గతంలో ఉన్న పోలీస్‌ఠాణాకు ఇప్పటికి ఎంతో వ్యత్యాసం ఉందని కరీంనగర్ ఎంపీ సంజయ్‌తో పాటు పలువురు ఫిర్యాదుదారులు సంతృప్తి వ్యక్తం చేశారు. పోలీస్స్టేషన్కు రావడానికి భయపడ్డానని ఇక్కడికి వచ్చిన తర్వాత ఆ భయం లేదకుండా పోయిందని ఓ ఫిర్యాదుదారుడు సంతృప్తి వ్యక్తం చేశారు.
గతేడాది చొప్పదండి పోలీస్ స్టేషన్‌ జాతీయ స్థాయిలో ర్యాంకు సాధించగా... ఈ ఏడాది జమ్మికుంటకు దక్కింది. ఆయా పోలీస్స్టేషన్లను స్ఫూర్తిగా తీసుకొని ఇదే తరహా సేవలందిస్తే బాగుంటుందని పలువురు సూచిస్తున్నారు.
