హుజూరాబాద్ ఉపఎన్నిక మొదటి నుంచి రాజకీయవర్గాల్లో ఆసక్తిని రేపింది (huzurabad by election). మాజీ మంత్రి ఈటల రాజేందర్‌ రాజీనామా చేసి భాజపాలో చేరి బరిలో దిగగా... తెరాస అన్ని సామాజిక సమీకరణల తర్వాత గెల్లు శ్రీనివాస్‌ యాదవ్‌ను పోటీలోకి దింపింది. నియోజకవర్గంలో గెలవాలనే పట్టుదలతో మండలాలవారీగా మంత్రులు, ఎమ్మెల్యేలకు ఇంఛార్జి బాధ్యతలు అప్పగించారు ముఖ్యమంత్రి కేసీఆర్.
పథకాలే గెలిపిస్తాయనే ధీమాతో..
ఆర్థికమంత్రి హరీశ్‌రావు (minister harish rao) తొలి నుంచి ప్రచార బాధ్యతలు భుజాన వేసుకుని పార్టీ శ్రేణులను సమన్వయపరిచారు. గడపగడపకు తిరుగుతూ... సామాజికవర్గాల వారీగా... సమావేశాలు నిర్వహిస్తూ ఓటర్లను ఆకర్షించే ప్రయత్నం చేశారు. దళితబంధు సహా పలు ప్రభుత్వ పథకాలను అమలుచేసి నియోజకవర్గ అభివృద్ధికి అనేక హామీలు గుప్పించారు. మునుపెన్నడూ లేనంతగా తెరాస రాజకీయ యంత్రాంగాన్ని మోహరించింది. కేంద్ర ప్రభుత్వ విధానాలతో ధరలు పాపంగా పెరిగాయని పెట్రో ఉత్పత్తులతో పాటు గ్యాస్‌ రేటు పెంచి సామాన్యుడి నడ్డి విరిచిందని ప్రచారాస్త్రాలుగా వినియోగించారు. పథకాల అమలు, లబ్ధిదారులకు అందించిన సంక్షేమ ఫలాలు తప్పక గెలిపిస్తాయని నమ్మకంతో అధికార పార్టీ ధీమాగా ఉంది.
ఆత్మగౌరవ నినాదంతో..
అందిరి కంటే ముందుగానే ప్రచారంలోకి దిగన ఈటల రాజేందర్‌ (etela rajendar) కాలికి బలపం పట్టుకుని నియోజకవర్గాన్ని చుట్టారు. రాష్ట్ర ప్రభుత్వ హామీల అమలులో వైఫల్యాలనే ఈటల రాజేందర్‌ ప్రధానంగా ప్రస్తావించారు. ఆత్మగౌరవ నినాదంతో ఓటర్లను ఆకట్టుకునే ప్రయత్నం చేశారు. ముఖ్యమంత్రి కక్షసాధింపుతో వ్యవహరిస్తున్నారంటూ ప్రచారంలో వివరించారు. ఈటలకు మద్దతుగా కేంద్రమంత్రుల మొదలు రాష్ట్రస్థాయి నాయకులు క్షేత్రస్థాయిలో సమావేశాలు రోడ్‌షోలతో హోరెత్తించారు. ప్రజలు తప్పక ఆశీర్వదిస్తారనే విశ్వాసంతో ఈటల ఉన్నారు.
సంప్రదాయ ఓటింగ్ పైన ఆశతో..
కాంగ్రెస్‌ తరఫున పోటీచేసిన బల్మూరి వెంకట్‌ (balmuri venkat) సైతం సంప్రదాయ ఓటింగ్‌కు భారీగా పడుతుందనే ఆశతో ఉన్నారు. ప్రచారంలో కాస్త వెనకపడ్డా చివరిలో పీసీసీ అధ్యక్షుడు రేవంత్‌ రెడ్డి రాకతో పార్టీశ్రేణుల్లో జోష్‌ కనిపించింది.
నువ్వానేనా అన్నట్లు పోటీపడ్డ హుజూరాబాద్ ఉప ఎన్నిక ఫలితంపై అన్నివర్గాల్లో ఆసక్తి నెలకొంది. మొత్తంమీద ఈవీఎంలలో నిక్షిప్తమైన అభ్యర్థుల భవితవ్యం మరికొద్ది గంటల్లో తేలనుంది.
ఇదీ చూడండి: Huzurabad By Election Counting: హుజూరాబాద్ ఉపఎన్నిక ఓట్ల లెక్కింపునకు కౌంట్డౌన్
