కన్నుల పండువగా జోగులాంబ బ్రహ్మోత్సవాలు జోగులాంబ గద్వాల జిల్లా అలంపూర్లో జోగులాంబ అమ్మవారి బ్రహ్మోత్సవాలు కన్నుల పండువగా జరుగుతున్నాయి. వేకువ జామునుంచే అమ్మవారి దర్శనానికి భక్తులు బారులు తీరారు. ఉత్సవాల సందర్భంగా నేడు విశేష పూజలు చేశారు. క్షీరాభిషేకం, పెరుగు, చందన తదితర సుగంద ద్రవ్యాలతో అభిషేకించారు. మహిళలు భారీ సంఖ్యలో తరలివచ్చి బోనాలు సమర్పించి మొక్కులు తీర్చుకున్నారు.
అమ్మవారిని రథంపై నగరవీదుల్లో ఊరేగించారు. బాణాసంచా కాలుస్తూ, మేళతాళాలతో సందడి చేశారు. ఆలయ పరిసరాలన్నీ భక్తులతో కిటకిటలాడాయి. ఉత్సవాల సందర్భంగా ఏర్పాటు చేసిన కార్యక్రమాలు అలరింపజేశాయి. శక్తి వేషాలు, ఇతర సంప్రదాయ నృత్య ప్రదర్శనలు ఆకట్టుకున్నాయి.
మాజీ మంత్రి డీకే అరుణ కుటుంబ సమేతంగా అమ్మవారిని దర్మించుకుని మొక్కులు చెల్లించారు. స్థానికులే కాకుండా పొరుగు జిల్లాల నుంచి కూడా భారీ సంఖ్యలో భక్తులు ఉత్సవాల్లో పాల్గొన్నారు. ఎలాంటి అవాంఛనీయ ఘటనలు జరగకుండా ఆలయ కమిటీ చర్యలు తీసుకుంది.
