భూపాలపల్లి అర్బన్‌ డెవలప్‌మెంట్‌ అథారిటీ (బుడా) ఏర్పాటు ప్రతిపాదనలకే పరిమితమైంది. పాలనను ప్రజలకు మరింత చేరువ చేయాలనే ఉద్దేశంతో కొత్త జిల్లాలను రెండేళ్ల క్రితం ఏర్పాటు చేశారు. భూపాలపల్లిని అన్ని రంగాల్లో అభివృద్ధి చేసేందుకు భూపాలపల్లి అర్బన్‌ డెవలప్‌మెంట్‌ అథారిటీ(బుడా) ఏర్పాటుకు అధికార యంత్రాంగం శ్రీకారం చుట్టింది.
2016 నవంబరులోనే ప్రభుత్వానికి ప్రతిపాదనలు పంపింది. పట్టణం నుంచి చుట్టూ ఉన్న 10 కిలోమీటర్ల పరిధిలోని గ్రామాలతో బుడా ఏర్పాటు చేయాలని ప్రతిపాదించారు. ఆ నివేదికను అప్పటి జిల్లా కలెక్టర్‌ మురళి రాష్ట్ర మున్సిపల్‌ శాఖ ముఖ్య కార్యదర్శికి పంపించారు. ఇప్పటికే రాష్ట్రంలోని కొన్ని నగరాలు, మున్సిపాలిటీలలో పట్టణాల అభివృద్ధికి ప్రభుత్వం అర్బన్‌ డెవలప్‌మెంట్‌ అథారిటీలను ఏర్పాటు చేసింది.
గూగుల్‌ సాయంతో ప్రతిపాదనలు
మున్సిపల్‌ శాఖ అధికారులు రంగంలోకి దిగి యుద్ధ ప్రాతిపదికన బుడా కోసం గూగుల్‌ సాయంతో ప్రతిపాదనలు సిద్ధం చేసి ప్రభుత్వానికి పంపారు. పట్టణంలోని 10 కిలోమీటర్ల పరిధిలో ఉన్న నాలుగు మండలాల్లోని 23 గ్రామాలు బుడా పరిధిలోకి వస్తున్నట్లు గుర్తించారు. బుడా ఏర్పాటైతే ప్రభుత్వం భూపాలపల్లి పట్టణ అభివృద్ధికి పక్కా ప్రణాళికతో పాటు ప్రత్యేకంగా నిధులు మంజూరు చేయడానికి అవకాశం ఉంటుంది. ఇప్పటికైనా పాలకులు, అధికారులు బుడా ఏర్పాటుకు కృషి చేయాల్సిన అవసరం ఎంతైనా ఉంది.
ఇదీ చూడండి : లక్నవరం సరస్సుకు తరలివస్తున్న పర్యాటకులు
