జయశంకర్ భూపాలపల్లి జిల్లా రేగొండలోని సొసైటీలో మొక్కజొన్న రైతులు ఆందోళనకు దిగారు. రైతుల నుంచి మక్కలు కొనుగోలు చేసి గోదాంకి పంపిన తర్వాత లారీని అధికారులు మళ్లీ వెనక్కి పంపించారు. రేగొండ, రంగయ్యపల్లి గ్రామాలకు చెందిన సుమారు 8 మంది రైతులు 5 రోజుల క్రితం 450 మొక్కజొన్నల బస్తాలు సొసైటీలో వేసి లారీ లోడ్ చేయించారు.
గోదాంకి వెళ్ళిన మొక్కజొన్నలో తేమ శాతం ఎక్కువ ఉందని అధికారులు వెనక్కి పంపించారు. సొసైటీకి వచ్చిన లారీని అన్లోడ్ చేసేందుకు హమాలీ ఛార్జీలు రైతులే చెల్లించాలన్నారు. ఎవరి బస్తాలు వారు తీసుకెళ్లాలని నిర్వాహకులు చెప్పగా.... రైతులు వాగ్వాదానికి దిగారు. మక్కల్లో తేమశాతం ఎక్కువగా ఉందని... తగ్గిన తర్వాత మళ్లీ పంపిస్తామని సొసైటీ అధికారి రైతులను బుజ్జగించారు.
