ఎరువులు విదేశాల నుంచి నౌకల్లో ఏపీ, తమిళనాడు, కర్ణాటక, గుజరాత్‌ తీర ప్రాంత ఓడరేవులకు వస్తున్నాయి. అక్కడి నుంచి గూడ్సు రైళ్లు, లారీల్లో తెలంగాణలోని అన్ని జిల్లాలకు పంపుతున్నారు. రవాణా ఛార్జీలను వసూలు చేయకుండా ఎరువులను గ్రామాల్లోని దుకాణాల వద్దకు పంపాలని కోరుతున్న ఎరువులశాఖ, ఆ మేరకు ఛార్జీలను కంపెనీలకు చెల్లిస్తోంది. ఆ సొమ్మును కంపెనీలు టోకు వ్యాపారులకు ఇస్తున్నాయి కూడా. ఆ మేరకు 45 కిలోల బస్తాను ‘గరిష్ఠ చిల్లర ధర’(ఎమ్మార్పీ) రూ.266.50కే అమ్మాల్సి ఉంటుంది.
టోకు వ్యాపారులు మాత్రం రవాణా ఛార్జీల సొమ్మును చిల్లర వ్యాపారులకు ఇవ్వడం లేదని సమాచారం. ఇదే అదునుగా గ్రామీణ వ్యాపారులు బస్తా యూరియాపై రైతుల నుంచి రూ.30-50 అదనంగా వసూలు చేస్తున్నారు. ‘లారీల కిరాయిలు మేమే కట్టుకోవాల్సి వస్తోంది. ఆ సొమ్మునే రైతుల నుంచి వసూలు చేస్తున్నామని వరంగల్‌ జిల్లాకు చెందిన ఓ చిల్లర వ్యాపారి ‘తెలిపారు. డీజిల్‌ ధరలు పెరిగినందున రవాణా ఛార్జీల భారం పెరిగిందని ఆయన స్పష్టం చేశారు.
పోర్టల్‌కు... వాస్తవానికి పొంతనేది?
నిజానికి ఎరువును ఏ వ్యాపారి అమ్మినా వెంటనే ‘ఎరువుల పర్యవేక్షణ విభాగం’(ఎఫ్‌ఎంఎస్‌) పోర్టల్‌లో నమోదు చేయాలి. ఈ పోర్టల్‌లో ఉన్న వివరాల ప్రకారం తెలంగాణలో ప్రస్తుతం 5.15 లక్షల టన్నుల యూరియా నిల్వలున్నాయి. వాస్తవానికి రాష్ట్రంలో ప్రస్తుతం 3.50 లక్షల టన్నుల నిల్వలున్నట్టు వ్యవసాయశాఖ లెక్కలు చెబుతోంది. పోర్టల్‌లో లెక్కల ప్రకారం రాష్ట్రంలో అధిక నిల్వలున్నాయని, అందుకే నిర్ణీత కోటాకన్నా లక్ష టన్నులు తక్కువగా సరఫరా చేసినట్లు కేంద్ర ఎరువులశాఖ వర్గాలు తెలిపాయి.
ఎప్పటికప్పుడు వ్యవసాయాధికారులు ఎరువుల దుకాణాలను తనిఖీ చేసి వివరాలు నమోదు చేయించకపోవడమే దీనికి కారణమనే విమర్శలున్నాయి. ప్రస్తుత యాసంగిలో వరిసాగు విస్తీర్ణం 46 లక్షల ఎకరాలకు చేరింది. ప్రస్తుత సీజన్‌లో వరినాట్లు ఇప్పుడే పూర్తయినందున ఈ నెల, వచ్చే నెల యూరియా వినియోగం గణనీయంగా పెరుగుతుందని, సరఫరా సరిగా లేకపోతే వ్యాపారులు ధర మరింత పెంచి రైతులను దోచుకునే ప్రమాదముందని ఓ వ్యవసాయాధికారి వివరించారు.
ఇచ్చేది 10 లక్షలు... వరికే 6.21 లక్షల టన్నులు
ప్రస్తుత యాసంగి సీజన్‌లో రాష్ట్రానికి 10 లక్షల టన్నుల యూరియా ఇస్తామని కేంద్ర ఎరువుల శాఖ గత సెప్టెంబరులో తెలిపింది. వరికి ఎకరానికి మూడు బస్తాల చొప్పున ఇప్పటికే సాగైన 46 లక్షల ఎకరాలకే 6.21 లక్షల టన్నులు అవసరమని అంచనా. నెలవారీ కోటా ప్రకారం ఇప్పటివరకు కేంద్రం నుంచి 8.51 లక్షల టన్నులు రాష్ట్రానికి రావాలి. 7.52 లక్షల టన్నులే వచ్చింది.
ఇదీ చూడండి: రాష్ట్రవ్యాప్తంగా ఉచిత వైద్య పరీక్షలకు సన్నాహాలు
