TSRTC Electric Buses : గ్రేటర్ హైదరాబాద్లో 1300 ఎలక్ట్రిక్ బస్సులను అందుబాటులోకి తీసుకురావాలని తెలంగాణ రాష్ట్ర రోడ్డు రవాణా సంస్థ నిర్ణయించింది. పర్యావరణ హితం, కాలుష్య నివారణతో పాటు ప్రజలకు మరెన్నో మెరుగైన, సౌకర్యవంతమైన ప్రయాణ హాయిని కలిగించేందుకు ఈ బస్సులను అందుబాటులోకి తీసుకురాబోతుంది. త్వరలో 25 ఎలక్ట్రిక్ ఏసీ బస్సులను అందుబాటులోకి తెచ్చేందుకు తెలంగాణ ఆర్టీసీ ఏర్పాట్లు చేస్తోంది.
Electric Buses in Hyderabad 2023 : హైదరాబాద్లోని బస్ భవన్ ప్రాంగణంలో కొత్త నమూనా ఎలక్ట్రిక్ ఏసీ బస్సును టీఎస్ఆర్టీసీ ఎండీ వీసీ సజ్జనార్ పరిశీలించారు. బస్సులో ప్రయాణికులకు కల్పిస్తున్న సౌకర్యాలను అధికారులను అడిగి తెలుసుకున్నారు. ఈ సందర్భంగా పలు సూచనలు చేశారు. వీలైనంత త్వరగా బస్సులను అందుబాటులోకి తీసుకురావాలని అధికారులను ఆదేశించారు.
రాష్ట్రంలో తొలిసారిగా నాన్‌ ఏసీ స్లీపర్ బస్సులు.. ఎప్పటినుంచంటే..!
ఒలెక్ట్రా గ్రీన్టెక్ లిమిటెడ్(ఓజీఎల్)కు 550 ఎలక్ట్రిక్ బస్సులను ఆర్టీసి ఆర్డర్ ఇచ్చినట్లు సజ్జనార్(TSRTC MD Sajjanar) తెలిపారు. అందులో 500 బస్సులను హైదరాబాద్ పట్టణంలో, 50 బస్సులు విజయవాడ మార్గంలో నడపాలని సంస్థ(Telangana RTC) నిర్ణయించినట్లు వెల్లడించారు. ఇప్పటికే విజయవాడ రూట్లో 10 ఎలక్ట్రిక్ బస్సులు నడుస్తున్నాయని వివరించారు.
'హైదరాబాద్లో తొలి దశలో 50 ఎలక్ట్రిక్ ఏసీ బస్సులు రాబోతున్నాయి. వాటిలో 20 శంషాబాద్ ఎయిర్ పోర్ట్ మార్గంలో తిరుగుతాయి. మరో 30 ఐటీ కారిడార్లో నడుస్తాయి. వాటిలో 25 బస్సులను త్వరలోనే ప్రారంభించేందుకు ఏర్పాట్లు చేస్తున్నాం. ఫ్యూచర్లో భాగ్యనగరమంతా ఈ-బస్సులనే నడపేందుకు ప్లాన్ చేస్తున్నాం.' - సజ్జనార్, తెలంగాణ ఆర్టీసీ ఎండీ
ఈ ఆర్థిక ఏడాదిలో సిటీలో 500 ఎలక్ట్రిక్ బస్సులను అందుబాటులోకి రాబోతున్నాయని సజ్జనార్ తెలిపారు. అందులో 50 ఏసీ బస్సులుండగా.. మిగతావి ఆర్డినరీ, మెట్రో ఎక్స్ప్రెస్ బస్సులున్నాయని ప్రకటించారు. గ్రాస్ కాస్ట్ కాంట్రాక్ట్ (జీసీసీ) పద్ధతిలో విడతల వారీగా ఈ బస్సులను టీఎస్‌ఆర్టీసీకి ఒలెక్ట్రా అందజేయనున్నట్లు వెల్లడించారు. వీటికి తోడు సిటీలో మరో 800 ఎలక్ట్రిక్ బస్సుల కొనుగోలు ప్రక్రియ ప్రాసెస్లో ఉందని చెప్పారు.
ఎలక్ట్రిక్ బస్సుల్లో ఉన్న ప్రత్యేకతలు ఇవే..
- 12 మీటర్ల పొడవు గల ఈ ఎలక్ట్రిక్ ఏసీ బస్సులు హైటెక్ హంగులతో తీర్చిదిద్దుకొని అందుబాటులోకి వస్తున్నాయి.
- ఈ బస్సుల్లో ప్రయాణించేవారికి ఎటువంటి అసౌకర్యం కలగకుండా మెరుగైన, నాణ్యమైన సేవలను అందించే విధంగా అన్ని సదుపాయాలు కల్పించారు.
- 35 సీట్ల సామర్థ్యం గల ఈ బస్సుల్లో మొబైల్ చార్జింగ్ సౌకర్యంతో పాటు సీటు బెల్ట్ సదుపాయం ఉంది.
- ప్రతి బస్సులోనూ మూడు సీసీటీవీ కెమెరాలను ఏర్పాటు చేశారు. వాటికి ఒక నెల రికార్డింగ్‌ బ్యాకప్‌ ఉంటుంది.
- బస్సు రివర్స్‌ చేసే సమయంలో వీలుగా రివర్స్‌ పార్కింగ్‌ అసిస్టెన్స్‌ కెమెరా కూడా అమర్చి ఉంటుంది.
- గమ్యస్థానాల వివరాలు కోసం బస్సులో నాలుగు ఎల్ఈడీ బోర్డులను ఏర్పాటు చేశారు.
- అగ్నిప్రమాదాలను ముందుగానే గుర్తించి సత్వరమే నివారించేందుకు బస్సుల్లో ఫైర్‌ డిటెక్షన్‌ సప్రెషన్‌ సిస్టం(ఎఫ్‌డీఎస్‌ఎస్‌)ను ఏర్పాటు చేశారు.
- ఈ బస్సులకు ఒక్కసారి ఛార్జింగ్ చేస్తే 225 కిలోమీటర్ల దూరం వరకు ప్రయాణించవచ్చు.
- ఈ బస్సులకు ఒక్కసారి పూర్తి చార్జింగ్ చేయటానికి 2 నుంచి 3 గంటల సమయం పడుతుంది.
- ప్రయాణికుల భద్రతను దృష్టిలో పెట్టుకొని ఈ వాహనాలకు వెహికిల్‌ ట్రాకింగ్‌ సిస్టమ్తో పాటు ప్రతి సీటు వద్ద పానిక్‌ బటన్‌ సదుపాయం కల్పించారు.
అందుబాటులోకి TSRTC ఉచిత వైఫై ఏసీ స్లీపర్ బస్సులు.. ప్రైవేట్ బస్సులకు దీటుగా..!
