ఫలించిన తెరాస వ్యూహం

శాసనమండలి ఎమ్మెల్యే కోటా ఎన్నికల్లో తెరాస వ్యూహం ఫలించింది. నలుగురు తెరాస అభ్యర్థులతో పాటు... మిత్రపక్షం ఎంఐఎం అభ్యర్థిని గెలిపించుకుంది. గెలుపొందిన ఎమ్మెల్సీలకు ముఖ్యమంత్రి కేసీఆర్ అభినందనలు తెలిపారు.

శాసనమండలి ఎమ్మెల్యే కోటా ఎన్నికల్లో నలుగురు తెరాస, ఒకరు ఎంఐఎం అభ్యర్థి విజయం సాధించారు. తెరాస నేతలు మహమూద్ అలీ, సత్యవతి రాథోడ్, శేరి సుభాష్ రెడ్డి, ఎగ్గె మల్లేశం.. మజ్లిస్​ నేత మిర్జా రియాజ్​ ఉల్​ హసన్​ అఫండీ ఎమ్మెల్సీలుగా గెలుపొందారు. కాంగ్రెస్ అభ్యర్థి గూడూరు నారాయణరెడ్డి ఓడిపోయారు. ఐదు స్థానాలకు జరిగిన ఎన్నికల్లో ఆరుగురు అభ్యర్థులు బరిలోకి దిగటంతో కొన్ని రోజులుగా నాటకీయ రాజకీయ పరిణామాలు చోటు చేసుకున్నాయి.

ఓటింగ్​కు దూరంగా విపక్షాలు

నోటిఫికేషన్ విడుదలైన నాటికి నామినేటెడ్ ఎమ్మెల్యేలతో కలిపి తెరాసకు 91 మంది సభ్యులు, ఎంఐఎంకు ఏడుగురు ఉన్నారు. కాంగ్రెస్​కు 19మంది.. తెదేపాకు ఇద్దరు, భాజపాకు ఒకరు ఉన్నారు. ఆ తర్వాత హస్తం ఎమ్మెల్యేలు రేగా కాంతారావు, ఆత్రం సక్కు, హరిప్రియ నాయక్, చిరుమర్తి లింగయ్య, తెదేపా ఎమ్మెల్యే సండ్ర వెంకట వీరయ్య గులాబీ పార్టీకి మద్దతు ప్రకటించారు. ఈ నేపథ్యంలో ఎన్నికను బహిష్కరించాలని కాంగ్రెస్ నిర్ణయించగా.. తెదేపా, భాజపా ఓటింగ్​కు దూరంగా ఉన్నాయి.

ముఖ్యమంత్రి కేసీఆర్, స్పీకర్ పోచారం శ్రీనివాస్ రెడ్డి, ఉప సభాపతి పద్మారావు సహా తెరాసకు చెందిన 91 మంది.. ఎంఐఎం సభ్యులు ఏడుగురు ఓట్లు వేశారు. మహమూద్ అలీ, సత్యవతి రాథోడ్, శేరి సుభాష్ రెడ్డికి ఒక్కొక్కరికి ఇరవై మంది.. ఎగ్గె మల్లేషం, మజ్లిస్​ అభ్యర్థి మిర్జా రియాజ్ ఉల్ హసన్ అఫండీకి ఒక్కొక్కరికి 19 మంది ఎమ్మెల్యేలు ఓట్లు వేశారు. గెలుపొందిన నేతలు సంతోషం వ్యక్తం చేశారు.

గులాబీ బాస్​ అభినందనలు..

తెరాస ఎమ్మెల్యేలు ఉదయం తెలంగాణ భవన్​కు చేరుకొని.. ముందుగా నమూనా ఓటింగ్​లో పాల్గొన్నారు. అనంతరం బస్సుల్లో అసెంబ్లీకి వెళ్లారు. ఎమ్మెల్సీలుగా గెలుపొందిన నేతలకు ముఖ్యమంత్రి కేసీఆర్ అభినందనలు తెలిపారు. అనంతరం గెలుపొందినతెరాస ఎమ్మెల్సీలు గన్ పార్క్ లోని అమరవీరుల స్థూపానికి నివాళులర్పించారు.

ఇవీ చూడండి: సీఎంను కలిసిన ఎమ్మెల్సీలు