పాలన కోసం శిక్షణ

పంచాయతీ ఎన్నికల్లో గెలిచిన సర్పంచులకు తెలంగాణ ప్రభుత్వం ఐదురోజులు శిక్షణ ఇవ్వనుంది. గ్రామ అభివృద్ధి, పంచాయతీరాజ్​ చట్టాలపై నిపుణలతో వివిధ అంశాలపై శిక్షణ ఇచ్చేందుకు సిద్ధమైంది ప్రభుత్వం.

సర్పంచ్​లకు పాలనపై అవగాహన కల్పించేందుకు ప్రభుత్వం సిద్ధమైంది. ఐదు రోజుల పాటు హైదరాబాద్​లో శిక్షణ ఇవ్వనున్నారు. విధులు, బాధ్యతలతో పాటు నూతన పంచాయతీరాజ్​ చట్టంపై ప్రధానంగా అవగాహన కల్పిస్తారు.

తెలంగాణలో మొదటి పంచాయతీ ఎన్నికలు ముగిశాయి. 12,680 సర్పంచ్ స్థానాలకు ఎన్నికలు పూర్తి అయ్యాయి. కొత్తగా ఎన్నికైన వారందరూ ఇవాళ ప్రమాణ స్వీకారం చేయనున్నారు. పంచాయతీరాజ్​ వ్యవస్థను పరిపుష్టం చేయాలన్న ఆలోచనలో చట్టంలో కొత్త అంశాలను పొందుపరిచింది రాష్ట్ర ప్రభుత్వం.
గ్రామాల్లో పారిశుధ్యం, పచ్చదనంపై ప్రత్యేక దృష్టి సారించాలని పేర్కొంది. చట్టం ప్రకారం ప్రతి పంచాయతీల్లో ఒక నర్సరీ తప్పనిసరి ఏర్పాటు చేయాలి. జనాభాకు అనుగుణంగా రాష్ట్ర బడ్జెట్​లోనే నిధులు కేటాయించడం వంటి అంశాలపై అవగాహన కల్పించాలని ప్రభుత్వం నిర్ణయించింది. హైదరాబాద్ సోమవారం ముఖ్యమంత్రి కేసీఆర్ ఈ కార్యక్రమాన్ని ప్రారంభించనున్నారు.